کفن وەک دیمەنی کۆتایی جەنگ وابوو

'كفن'ـم بینی، وەک دیمەنی كۆتایی جەنگ وابوو، هەموو باوەشیان بەیەكدا دەكرد، هونەرمەندان لەگەڵ یەكتر، بینەر و بەشداربووانی فیلمی كفن، تەنانەت بینەران لەناو خۆیاندا دەچوون بۆ دەربڕینی دڵخۆشی و پیرۆزباییکردن لە دانیشتووانی گەڕەکێک کە پاش نزیكەی دوو كاتژمێر بۆردوومان لە ژێرزەمینێک بەسەلامەتی هاتنە دەرەوە.

 

نمایشی سەرنجڕاكێشی پاڵەوانانی فیلمی 'كفن' بە دینامیكی و درەوەشانەوەیان لە نواندن، ئەو كەشەیان دروستكرد، بەهرە و دەرخستنی توانای بێوچانیان لە گوزارشتكردن بۆ ئەو حەزەی نواندن پێویستییەتی، گێژاوی دەروونی، دڵەڕاوكێ، ترس، گومان، وایان كرد خەیاڵی بینەران بۆ سەد دووڕیان بەرن.

 

دەركەوتنی جیاوازی چریكە عەبەڕەش، ئەستێرەی درەوشاوەی كوردستان، لە 150 خولەكدا، توانای لە نواندن، مامەڵەی لەگەڵ زوومی كامێرا، دەرخستنی باری دەروونی پاڵەوانەكە، سەرنجڕاكێش بوون، حەپەسابووم لەبەردەم ئەو بەهرە جوانەی، دەستی ماچ دەكەم.

 

فیلمی كفن، لە نووسین و دەرهێنانی سروشت عەبەڕەشە، نواندنی چریكە عەبەڕەش، نزار سەلامی، كارۆ سەوز، سازگار فوئاد، چەندین هونەرمەندی دیکە، بەرهەمهێنانی باهۆز نەسرەدینە و بەرهەمی میترۆنۆم پرۆدەكشن بە هاوبەشی لەگەڵ ئاڤا میدیایە.

 

سەركەوتن و لێهاتوویی ئەكتەر و دەرهێنەر، مانای ئەوە نییە من لەگەڵ پەیامی كۆتایی چیرۆكەكە بم، ڕێک پێچەوانەی بیركردنەوەی منە، من سەرسام بووم بە نواندن و تەكنیكی ئەم بەرهەمە. 

 

بچن بلیتەكەتان بكڕن.