مێزە بچووکەکەی واشنتن: کلیلی گۆڕانکاری لە وزە و ئابووری هەرێمدا

لەسەروبەندی گۆڕانکاری و پێشهاتە ئابوورییە هەستیارەکانی ناوچەکە و جیهاندا، سەردانی شاندی حکومەتی هەرێمی کوردستان بە سەرۆکایەتیی سەرۆکی حکومەت بۆ ویلایەتە یەکگرتووەکانی ئەمریکا، وەک وێستگەیەکی گرنگی ئابووریی دێتە هەژمار کردن.

 ئەم سەردانە هەوڵێکی ورد و نەخشە بۆ داڕێژراوە بۆ پتەوکردنی بناغەیەکی هاوبەشییەکی ئابووریی فرەڕەهەندە، کە تێیدا بواری وزە وەک کۆڵەگەیەکی سەرەکی و بزوێنەری ئابووری هەرێم، پێگە و ئاماژەی تایبەتی پێدراوە.

ئەم سەردانە لە کاتێکدا ئەنجامدرا کە هەرێمی کوردستان پێویستی بە کردنەوەی ئاسۆی نوێی ئابووری و بەهێزکردنی بوونیادی دارایی و ئابووری خۆی هەیە.

 

دیدار و کۆبوونەوەکانی شاندی حکومەت لەگەڵ بەرپرسانی باڵای ئیدارەی ئەمریکا، لە وەزارەتەکانی وزە و ناوەندە پەیوەندیدارەکان، پەیامێکی ئابووری ڕوونی هەڵگرتبوو؛ هەرێمی کوردستان خوازیاری بوونیادنانی پەیوەندییەکی ئابووریی قووڵتر و ستراتیژیترە لەگەڵ واشنتن'دا.

 

 جەختکردنەوە لەسەر پەرەپێدانی ئابووری و باشترکردنی ژینگەی وەبەرهێنان، تەوەری سەرەکییەکانی ئەم دیدارانە بوون، بەڵام ئەوەی کە زیاتر سەرنجی لەسەربوو و چاوەڕوان دەکرێت کاریگەرییەکی ڕاستەوخۆ و درێژخایەنی ئابووری و دارایی هەبێت، بابەتی وزە و گرێبەستەکانی بواری وزە بوون.

 

ئەم بابەتە وەک خاڵێکی ناوەندی لە چوارچێوەی گفتوگۆکان و دواتر لەسەر (مێزە بچووکەکەی واشنتن'دا) ئەو مێزەی بووە شاهیدی واژۆکردنی بنەما سەرەتاییەکانی گرێبەستە گرنگەکانی وزە لە نێوان هەرێمی کوردستان و کۆمپانیا ئەمریکییەکاندا، وەک کلیلی گۆڕانکارییەکی چاوەڕوانکراوی ئابووری هاتە بەرباس. گرنگیی ئەو مێزە بچووکە تەنها لەوەدا نییە کە چەند گرێبەستێکی لەسەر واژۆکرا، بەڵکو لەوەدایە کە بووەتە هێمای دەستپێکێکی نوێ و هاوبەشییەکی ستراتیژیی ئابووری لە بواری وزەدا.

 

گرێبەست و لێکتێگەیشتنەکان لە بواری وزەدا، کە لە پەراوێزی ئەم سەردانەدا و لەسەر ئەو مێزە مێژووییە بناغەیان بۆ داڕێژرا وە واژۆیان لەسەرکرا، وەک وەرچەرخانێکی گرنگ لە بواری ئابووری وزەی هەرێمدا سەیر دەکرێت. ئەو مێزەی کە نوێنەرانی هەرێمی کوردستان و کۆمپانیاکانی وزەی ئەمریکا لە دەوری کۆبوونەوە، نەک تەنها شوێنی واژۆکردنی چەند بەڵگەنامەیەک بوو، بەڵکو بووە سەکۆیەک بۆ نمایشکردنی ئیرادەی ئابووریی هاوبەش. هاتنی کۆمپانیا گەورەکانی بواری وزەی ئەمریکا بۆ هەرێمی کوردستان، تەنها بە مانای دۆزینەوە و دەرهێنانی نەوت و گاز نایەت، بەڵکو گواستنەوەی تەکنەلۆژیای پێشکەوتوو، ستانداردە نێودەوڵەتییەکانی کارکردن، شارەزایی و ئەزموونی چەندین ساڵەی ئەم کۆمپانیایانەیە بۆ ناوخۆی هەرێم. ئەمە جگە لەوەی کە سەرمایەیەکی گەورە دەخاتەگەڕ کە دەبێتە هۆی بووژانەوەی ئابووری و دابینکردنی هەلی کاری زیاتر و باشتر بۆ گەنجان و هاووڵاتییانی کوردستان. هەروەها گرنگیەکەی لە چۆنیەتی بەڕێوەبردن و سوودوەرگرتن لەم سامانە سروشتییەدایە، بە شێوەیەک کە ببێتە مایەی گەشەپێدانێکی ئابووریی بەردەوام و فرەچەشنکردنی سەرچاوەکانی داهات و دابینکردنی دەرفەتی باشتربوونی لایەنی دارایی بۆ هەرێم.

 

چاوەڕوان دەکرێت لە داهاتوودا، ئەم گرێبەستانەی وزە کە لە واشنتن و لەسەر ئەو مێزە بچووکە واژۆکران، ڕۆڵێکی کاریگەر و یەکلاکەرەوە بگێڕن لە چەندین بواری ئابووری و داراییدا.

 

یەکەم - دەبنە هۆی دابینکردنی وزەیەکی بەزرتر بۆ هەرێمی کوردستان و کەمکردنەوەی پشتبەستن بە سەرچاوەی سنووردار، کە ئەمەش بنەمایەکی گرنگە بۆ گەشەی ئابووری.

 

دووەم - هەرێمی کوردستان دەتوانێت ببێتە بەشدارێکی کاراتر لە بازاڕی وزەدا، ئەمەش نەک تەنها داهاتی زیاتر بۆ خەزێنەی هەرێم دابین دەکات و لایەنی دارایی بەهێزتر دەکات، بەڵکو ژینگەی وەبەرهێنانیش باشتر دەکات.

کاتێک کۆمپانیا گەورەکان بەرژەوەندی ئابوورییان لە هەرێمدا هەبێت، ئەمە دەبێتە هاندەرێک بۆ پەرەپێدانی ئابووری.

سێیەم - ئەم گرێبەستانە، دەتوانن ببنە دەروازەیەک بۆ هاتنی وەبەرهێنانی بیانی لە کەرتەکانی دیکەشدا، وەک کشتوکاڵ، پیشەسازی، و گەشتوگوزار، چونکە متمانە بە ژینگەی ئابووری و وەبەرهێنانی هەرێم زیاد دەکەن و بوژانەوەی ئابووری فراوانتر دەکەن.

 

بەهێزبوونی پێگەی ئابووری هەرێمی کوردستان لە ڕێگەی ئەم گرێبەستانەی وزەوە، ڕاستەوخۆ کاریگەری ئەرێنی لەسەر توانای دارایی و خۆبژێوی هەرێم دەبێت.

 

ئابوورییەکی بەهێزتر و خاوەن داهاتی جێگیرتر، توانایەکی زیاتر بە هەرێم دەبەخشێت بۆ جێبەجێکردنی پڕۆژە خزمەتگوزارییەکان، پەرەپێدانی ژێرخانی ئابووری و باشترکردنی بژێوی هاووڵاتییان، هەروەها دەرفەتی باشتربوونی لایەنی دارایی حکومەت و تاکەکانیش مسۆگەر دەکات.

 

لە کۆتاییدا، دەتوانین بڵێین سەردانەکەی شاندی حکومەتی هەرێمی کوردستان بە سەرۆکایەتیی سەرۆکی حکومەت بۆ ئەمریکا و ئەو تەرکیزە ستراتیژییەی کە لە دەوری 'مێزە بچووکەکەی واشنتن' و بەتایبەتی لەسەر ئەو مێزەی کە لێکتێگەیشتنە سەرەتاییەکانی وزەی لەسەر واژۆکرا، هەنگاوێکی بوێرانە و دووربینانەی ئابوورییە.

 

ئەو مێزە بووەتە نیشانەیەک بۆ وەرچەرخانێکی ئابووریی چاوەڕوانکراو. سەرکەوتنی ئەم هەوڵانە و جێبەجێبوونی ئەم گرێبەستانە بە شێوەیەکی سەرکەوتوو، نەک تەنها ئایندەیەکی گەشتر بۆ ئابووری هەرێم و بوژانەوەی ئابووری مسۆگەر دەکات، بەڵکو بناغەکانی گەشەپێدانێکی ئابووریی هەمەلایەنەش پتەوتر دەکات. بێگومان، ئەمە پێویستی بە کاری بەردەوام هەیە تا بتوانرێت زۆرترین سوود لەم دەرفەتە زێڕینە وەربگیرێت و هەرێمی کوردستان بەرەو کەناری پێشکەوتنێکی ئابووری و خۆشگوزەرانییەکی دارایی هەمەلایەنە هەنگاو بنێت و هەلی کاری زیاتر و دۆخێکی دارایی باشتر بۆ هاووڵاتییانی فەراهەم بکات، بۆیە قەبارەی مێزەکە گرنگ نیە، ئەوەی گرنگە پەیام و ئامانجەکان مەزنن.