پەیامی درۆنهاوێژەکان و ئاسایشی وزەی کوردستان

چەند هەفتەیەکە بەبەرچاوی دنیاوە، زنجیرە هێرشێکی درۆنیی، کێڵگە و چاڵگە نەوتی و غازییەکانی هەرێمی کوردستانیان کردۆتە ئامانج . لە کێڵگەیەکەوە بۆ کێڵگەیەکی تر، لە دامەزراوەیەکەوە بۆ یەکێکی تر، سەرچاوەکانی نەوت و گازی کوردستان بوونەتە ئامانجی  پلان و پیلانێکی چەپەڵی نەیار و داگیرکەرانی کوردستان.  پاش ئەوەی هەموو ڕێگاکانیان تاقیکردەوەو هیچی خراپ نەما بەرامبەر بە قەوارەی هەرێمی کوردستان خەڵکەکەی نەیانکردبێت.. هیچ تاپۆیەک نەما دەستی ناپاکییان بۆ نەبردبێ، تا گەیاندیانە بڕینی نانی مووچەخۆران و  بێ بەشکردنی بەساڵاچووان و نەخۆشەکانمان لە دەرمان و منداڵانمان لە شیر و جەژنانە ! بۆیان دەرکەوت بێ سوودە و ئەم گەلی کوردستانە  (کەو) نییە و (کەوەرە) ؛  ( کەو ) نییە بۆ ڕاوکردنی یەکدی بەکاربێن، بەڵکو ( کەوەرە ) و  هەرچەند زیاتر بیبڕیتەوە،  ئەم زیاتر سەرهەڵدەداتەوە و کۆتایی نایەت!  پاش ئەوەی کۆڵیاندا لە هەموو شێوازە تاقیکراوەکان، سەرانیان بە ڕاوێژی هەندێ زۆڵە کورد، پیلانی لێدانی سەرچاوەکانی وزەی کوردستانیان بۆ میلیشیا و چەکدارە بەکرێگیراوەکانیان داڕشت. بەم زنجیرە هێرشە درۆنیە سروشتی ململانێ ئاڵۆزەکانی ناوچەکە دەگۆڕێت دەیباتە ئاستی گەمارۆدانی قەوارە و خەڵکی هەرێمی کوردستان.

 
ڕاستە درۆنهاوێژە ترسنۆکەکان نەیانتوانیوە زیانی ماددیی گەورە بە دامەزراوە نەوتی و غازییەکان بگەێنن، بەڵام نیگەرانییەکی زۆریان لە دڵی کۆمپانیا وەبەرهێنە بیانیەکان دروست کردووە . تا ئێستا هیچ گرووپ و لایەنێکیش غیرەتی ئەوەی نەبووە بەرپرسیارێتیی ئەو هێرشانە بگرێتە ئەستۆ ، بەڵام کۆنتێکستی گشتیی ڕووداوەکان پێمان دەڵێت:  ئەم زنجیرە هێرشە درۆنییە و لەم ئان و ساتەدا، هەڕەمەکی نین و بێ پلان و پیلان نین، بەڵکو خاونیان هەیە و هەڵگر وگەیێنەری چەند پەیامێکی ڕاستەوخۆن لە دەرەوەی  هاوکێشەی  چەند مەتر بۆریی غاز و چەند بەرمیلێک نەوت.

کێ درۆنەکان ئاراستە دەکات؟

شرۆڤەکارانی سیاسی و سەربازی، ئاماژە بە ڕۆڵی ئەو گرووپە چەکدارانە دەکەن کە پەیوەندییان بە میحوەری مقاوەمەوە هەیە و لەوانەیە لەو ناوچانەوە درۆنەکانیان ئاراستە بکەن کە لەژێر کۆنترۆڵی میلیشیا دەستڕۆیشتووەکانی ناو  دەسەڵاتی عێراق دایە و ئامانجیان فشار خستنە سەر حکومەتی هەرێمی کوردستانە سەبارەت بە دۆسیەی نەوت و غاز بەمەبەستی کۆسپ خستنە بەردەم  هەنگاوەکانی نزیکبوونەوەی هەولێر - ئەنقەرە و  هەولێر - واشنتۆن لەم پرسە ستراتیژییە هەستیارەدا.

ئەوەی جێی سەرنجە و نیشانەی پرسیار و گومان دەخاتە سەر کۆی زنجیرە هێرشەکە  ئەمەیە کە هاوکات بوون لەگەڵ بەرەوپێشچوونی  گفتوگۆ و دانوستاندنەکانی نێوان هەولێر و بەغدا و کۆمپانیاکان، سەبارەت بە دەستپێکردنەوەی هەناردەکردنی نەوتی کوردستان لە ڕێگەی بەندەری جەیهانی تورکییەوە. 

ئەو پەیامانەی لەگەڵ ئاگری درۆنەکاندا دەیاننێرن چین ؟  

ئامانجی ئەم زنجیرە هێرشە تەنیا هەرێمی کوردستان نییە، بەڵکو چەند  پەیامێکی فرە ئاراستەشیان گەیاندووە:

پەیام بۆ هەولێر: لە هاوپەیمانێتیتان لەگەڵ ئەمریکادا بکشێنەوە و دەست لە خەونی سەربەخۆیی لە دۆسیەی نەوت و غاز هەڵبگرن، چونکە ڕێنادەین بۆتان بچێتە سەر.

 پەیام بۆ بەغدا:  کۆنترۆڵی پەیوەندییەکانتان لەگەڵ کوردستان  بکەن و  سەرچاوەکانی وزە بگێڕنەوە ژێر دەستی حکومەتی ناوەند.

پەیام بۆ ئەمریکا و تورکیا:  ڕێ نادەین هەژموونتان هەبێت بەسەر ئابووریی ناوچەکەوە بەتایبەتی لە سێکتەری وزەدا.

پەیام بۆ کۆمپانیا نێودەوڵەتییەکان:  ئاسایشی وزە لە هەرێمی کوردستاندا لاوازەو  پارێزراو نیە. هەر کاتێک بمانەوێت دەیکەینە ئامانجی هێرشەکانمان.

 

لەبەرامبەر هەموو ئەم پەیامانەدا کە بارگاوین بە بیری توندڕەوی و تیرۆرستی، بەرجەستەکاری سیاسەتی دژە سەقامگیری و ئاوەدانیین لە ڕۆژهەڵاتی ناوەڕاستدا، وەڵام و کاردانەوە و  جووڵەی دامەزراوە و ئەکتەرە کاریگەرەکانی دەوڵەتی عێراق، زۆر ترسنۆکانە و شەرمن و بێ ئەرزش بوون. بەهیچ پێوەرێکیش لەگەڵ قەبارەی مەترسییەکاندا  ناگونجێن . لە دەربڕینی نیگەرانی و سەرکۆنەکردن زیاتر تا ئێستا هیچ کاردانەوەیەکی ڕژد و تۆکمەی  نەنواندووە بۆ  دڵنیاکردنەوەی ڕای گشتیی هەرێمی کوردستان و عێراق ، یان هیچ نەبێ  بۆ یار و نەیاری بسەلمێنێی کە لە عێراقیشدا شتێک هەیە بە ناوی دەوڵەتەوە و بەرگریکردن و پاراستنی گەل و خەڵکی بیانی و دامەزراوەکانی وزە، ئەرکی لەپێشینەیەتی.

 چارەسەر چییە؟

بەردەوامیی بە ئامانجگرتنی سەرچاوەکانی وزە لە هەرێمی کوردستاندا و  نەبوونی جووڵەیەکی سیاسی و ئەمنیی  تۆکمەو پلان بۆداڕێژراو ، مەترسی دەخاتە سەر سەقامگیری ناوچەکە و متمانەی وەبەرهێنەران لاواز دەکات. حکومەتی هەرێمی کوردستانیش ڕووبەڕووی دوو بژاردەی یەکلاکەرەوە دەکاتەوە : یان ڕازیبوون بە دیفاکتۆ و  قبووڵکردنی سیاسەتی سەپێنراوی ئەمڕی واقیع ( کە دڵنیام نایکات )! یان گەڕانە بەدوای هاوپەیمانێتییەکی نێودەوڵەتیی  زۆر بەهێزتر بۆ پاراستنی خاک و سامان و گەلەکەی. 

لەپێناو  پاراستنی سێکتەری وزە کە شاخوێنبەری ژیان و مانەوەمانە  لە کوردستاندا، سەرکۆنەکردنی هێرشەکان دادمان نادات ، بەڵکو پێویستمان بە هەڵسەنگاندن و پێداچوونەوەیەکی  گشتیی سیستەمی ئاسایشی وزەیە لەڕێی بەهێزکردنی هاوکێشەی هاوبەشیی نێوان هەرێمی کوردستان و زلهێزەکانی دونیا و ناوچەکەوە . پێویستە حکومەتی کوردستان و لایەنە سیاسییەکان لە جووڵەیەکی یەکگرتووی ڕژد و تۆکمەدا ، نەخشەڕێگایەک بۆ قەڵابەندکردنی هەرێمی کوردستان، لە ڕووی ئەمنی و سیاسی و سەربازییەوەدابڕێژن و پێکەوە ڕووبەڕووی هەر دەستدرێژی و مەترسییەک ببنەوە کە ڕوو لە ئاسایشی وزەی کوردستان و سەروەریی حکومەتی هەرێمی کوردستان دەکات .چونکە چیتر نەوت و غازی کوردستان تەنیا سەرچاوەیەکی داهات نین، بەڵکو بوونەتە فاکتەرێکی هەرە گرنگی سیاسی و کۆڵەگەی بونیادنانی ئایندەمانن.