مالیكی سەرۆكایەتیی یەكەم دانیشتنی خولی شەشەمی پەرلەمانی عێراق دەكات

ئاڤا نیوز

بەو پێیەی بەتەمەنترین كاندیدی سەركەوتووی ئەم هەڵبژاردنەیە، نوری مالیكی، سەرۆكی هاوپەیمانیی دەوڵەتی یاسا و سەرۆكوەزیرانی پێشووتری عێراق لە دوو خولدا، ئەگەر بچێتە پەرلەمان، سەرۆكایەتیی یەكەم دانیشتنی ئەم خولەی ئەنجوومەنی نوێنەرانی عێراق دەكات.

ئەوەی پێویستە بیزانیت: لەنێو 329 كاندیدی سەركەوتووی هەڵبژاردنی خولی شەشەمی ئەنجوومەنی نوێنەرانی عێراق، نوری مالیكی، سەرۆكی هاوپەیمانیی دەوڵەتی یاسا كە پێشتریش دووجار سەرۆكوەزیرانی عێراق بووە، بە تەمەنترین كاندیدی دەرچووە لەنێو بەربژێرە سەركەوتووەكان و ئێستا تەمەنی 75 ساڵە، بەپێی پەیڕەوی ناوخۆیی ئەنجوومەنی نوێنەرانی عێراقیش، تاوەكو هەڵبژاردنی دەستەی سەرۆكایەتی خولی نوێی پەرلەمان و ڕاسپاردنی لایەنی براوەی یەكەمی هەڵبژاردن بە دیاریكردنی دەستەی سەرۆكایەتییەكە، بەتەمەنترین كاندیدی دەرچوو، سەرۆكایەتیی یەكەم دانیشتنی ئەنجوومەنی نوێنەران دەكات.

زانیاریی زیاتر: نوری مالیكی لە بازنەی بەغدا كاندید بوو و سەرۆكی لیستی هاوپەیمانیی دەوڵەتی یاسا بوو لە بازنەی بەغدا، بەپێی ڕاگەیاندنی ئەنجامی بەرایی كۆمیسیۆن 68 هەزار و 785 دەنگی هێناوە و لەسەر ئاستی زۆرترین دەنگی كاندیدەكان، لە پلەی چوارەم دێت، لیستەكەشی بە بردنەوەی زیاتر لە 742 هەزار دەنگ بووە خاوەنی (28) كورسیی پەرلەمانی.

ئەمەش بزانە: نوری مالیكی لەماوەی ڕابردوودا، دووجار سەرۆكوەزیرانی عێراق بووە لە ساڵانی 2005 تاوەكو 2009 وە لە خولی دووەمیش لە ساڵانی 2009 بۆ 2014، سەرۆكوەزیرانی عێراق بووە.