شەپۆلێکی بەفر و باران هەرێمی کوردستان دەگرێتەوە

ئاڤا نیوز

بەڕێوەبەرایەتی گشتیی کەشناسی و بوومەلەرزەزانی بڵاوی کردووەتەوە، لە زۆربەی ناوچەکانی هەرێمی کوردستان، سبەی شەممە، باران دەبارێت و پێشبینی دەکرێت لە ناوچە شاخاوییە سنوورییەکان کەمێک بەفر ببارێت.

بڵاوکراوەی فەرمی: بە پێی بڵاوکراوەیەکی بەڕێوەبەرایەتی گشتیی کەشناسی و بوومەلەرزەزانی هەرێم، سبەى شەممە، ئاسمانی هەرێمی کوردستان، بە گشتی هەور و باراناوی دەبێت، لە زۆربەی ناوچەکان باران دەبارێت، لە هەندێک ناوچە دەگۆڕێت بۆ لێزمە باران و هەورەتریشقە، هەروەها پێشبینی دەکرێت لە ناوچە شاخاوییە سنوورییەکان بەڕێژەیەکی کەم بەفر ببارێت.

زانیاریی زیاتر: لەبارەی خێرایی با و پلەکانی گەرما هەر لە بڵاوکراوەکەدا هاتووە سبەی بەم شێوەیە دەبێت:

٠ خێراىی با مامناوەند دەبێت، لەنێوان 15 بۆ 25  کیلۆمەتر، لە هەندێک کاتیش چالاک دەبێت بۆ سەرووی 35 کیلۆمەتر لە کاتژمێرێکدا.

٠ ئاراستەی با لە باشووری خۆرهەڵاتەوە دێت.

٠ پلەکانی گەرما بە نزیکی چوار تا شەش پلە نزمتر دەبێت بەراورد بە  ئەمڕۆ هەینی.

٠ مەوداى بینین 6 بۆ 8  کیلۆمەتر دەبێت .

لێدوانی فەرمی: شێخ دارا، شارەزای کەشوهەوا و پێشکەشکاری ئاڤا ڕاگەیاند: لە ئێوارەی ئەمڕۆوە شەپۆلێکی باران لە دەریای سوورەوە ڕوو لە هەرێمی کوردستان دەکات و شەپۆلەکە باشووری عێراقیش دەگرێتەوە و لەوێ خۆڵبارین و باران دەبێت، لە ماوەی 15 ڕۆژی دیکە ئەگەری هەیە بەهۆی زۆری ڕێژەی باران بارین پەڵە بدات لە کۆتایی مانگیش لە زۆربەی ناوچەکانی هەرێمی کوردستان ئەگەری بەفربارین هەیە.