مەسرور بارزانی پرۆژەیەکی نوێ بۆ گەنجان ڕادەگەیێنێت

ئاڤا نیوز

مەسرور بارزانی، سەرۆکوەزیرانی کوردستان لە کۆڕبەندی مێپس لە دهۆک باسی گەنجان دەکات و ڕایدەگەیێنێت، لە پاڵپشتیکردنیان بەردەوام دەبین.

چیرۆکی سەرەکی: ڕۆژی چوارشەممە، مەسرور بارزانی، سەرۆکوەزیرانی کوردستان لە کۆڕبەندی مێپس (شەشەمین کۆڕبەندی ئاشتی و ئاسایشی ڕۆژهەڵاتی ناوەڕاست) دیدارێکی تایبەتی هەبوو، تێیدا گفتوگۆ لەسەر دۆخی هەرێمی کوردستان، عێراق و ناوچەکە کرا، لە بەشێکی گفتۆکەدا سەرۆکوەزیران تیشکی خستە سەر گەنجان و پڕۆژەکانیان.

لێدوانی فەرمی: مەسرور بارزانی، سەرۆکوەزیرانی هەرێمی کوردستان لە دیدارێکی تایبەتدا لە مێپس ڕایگەیاند، حکومەت پاڵپشتیی پڕۆژەی گەشانەوە دەکات، تاوەکو گەنجان پارە لە بانک قەرز بکەن و پڕۆژەکانیان جێبەجێ بکەن، بۆیە ئەگەر سیستەم و دامەزراوەیەکی باش هەبێت، بانکەکان دەتوانن پارە بە قەرز بدەنە گەنجان، گەنجانیش دەتوانن پڕۆژەکانیان جێبەجێ بکەن، دواتر پارەکە بگەڕێننەوە بۆ بانک، لەم پڕۆسەیەشدا حکومەت دەبێتە نێوەندگیر.

زانیاریی زیاتر: ئێمە ئەزموونمان هەیە، 25 بزنسی گەنجان، کە هەندیک لەوان ویستیان پڕۆژەکانیان گەورەتر بکەن و پێویستیان بە هاوکاری هەبوو، حکومەت هاوکاریی کردن، زۆریش لە پڕۆژەکانیان سەرکەوتوو بوون. ئێمە سەربەخۆ پارە نادەینە هێچ کەسێک، دەبێت ئەو کەسە بیسەلمێنێت کە پلانی هەیە و ئەوە جێبەجێ دەکات کە دەیڵێت. بۆیە پەیوەندیی نێوان خەڵک و حکومەت زۆر گرنگە، هاوکات ئێمە لە پاڵپشتیکردنی گەنجان بەردەوام دەبین. مەسرور بارزانی، سەرۆکوەزیرانی کوردستان وا دەڵێت.

باکگراوند: پڕۆژەی گەشانەوە دەستپێشخەریی دابینکردنی پاڵپشتی داراییە لەلایەن حکومەتی ھەرێمی کوردستانەوە بۆ بزنسە بچووک و مامناوەندەکانی گەنجان.