یاریی ئەلیکترۆنیی "لۆدۆ" لە عێراق قەدەغە دەکرێت

ئاڤا نیوز

هویام یاسری، وەزیری پەیوەندییەکانی عێراق بڕیاریدا یاریی ئەلیکترۆنیی "لودۆ" قەدەغە بکات و ڕایگەیاند: "لەپێناو پاراستنی خێزانە عێراقییەکان لە ڕەشبگیری ئۆنلاین و گەندەڵی ئەخلاقی بڕیارەکە دراوە".

ڕاگەیێنراوی فەرمی: وەزارەتی پەیوەندییەکان لە ڕاگەیێنراوێکدا بڵاوکردەوە، هویام یاسری، بەپێی دەسەڵاتی خۆی و لە جێبەجێکردنی بڕیارەکانی دادگای باڵای فیدراڵی، بڕیاریداوە یاریی لودۆ بلۆک بکات بۆ پاراستنی خێزانە عێراقییەکان لە زیادبوونی مەترسییەکان و کاریگەرییە نەرێنییەکانی لەسەر پەیکەری کۆمەڵایەتی.

کاریگەریی و لێکەوتەکان: وەزارەتەکە ئاماژەی بۆ ئەوەش کرد کە "یارییەکە بووەتە سەرچاوەی ناکۆکی لەناو زۆرێک لە خێزانەکانی و نێوان ژن و مێرد بەهۆی سیستمی گرەوکردنەوە، کە هانی کردەوەی مەترسیدار و قبووڵنەکراو دەدات".

قووڵتر: لە ڕاگەیێنراوەکەی وەزارەتە عێراقییەکە هاتووە، بڕیاری بلۆککردنی یارییەکە دوای چاودێریکردن و بەدواداچوونی بەردەوامی کۆمەڵێک سەرپێچی و کێشە دێت کە بەهۆی ئەم یارییەوە دروست بوون، هەندێکیان لەڕێگەی چاتی تایبەتەوە ڕوودەدەن کە ڕێگە بە پەیوەندیی ڕاستەوخۆ دەدات و ژینگەیەک دەستەبەر دەکات بۆ ئیستغلالکردنی سێکسی و ڕەشبگیریی ئەلیکترۆنی، ئەمە جگە لە بڵاوکردنەوەی ناوەڕۆکی بێ ئەخلاقی و لادان کە هەڕەشە لە سەقامگیری خێزان و کۆمەڵایەتی دەکات".