ئێستا ئیتر کاتی یەکدەنگییە

 

پەیوەندیی عێراق و هەرێمی کوردستان لەبنەمادا پەیوەندییەکی سیاسییە نەک یاسایی، ئەم پەیوەندییەش بەدەستووری ساڵی 2005 ڕێکخراوە. 

 

بەڵام زۆر کەس لەمە تێنەگەیشتن تا دوای بڕیاری وەزارەتی دارایی عێراق، بە نەناردنی مووچەی مووچەخۆرانی هەرێمی کوردستان لە دوا ساتدا، ئەمە بە تەواوی عێراق لە بانگەشەی یاسایی بوون ڕووتکردەوە. 

 

وەزارەتی دارایی بەغدا بە درێژایی مانگی پێنج هیچ کێشەیەکی لە ناردنی مووچە ڕانەگەیاندووە، بەڵکو هەرچی ڕیکار هەیە لەگەڵ وەزارەتی دارایی هەرێم هەمووی تەواو کردووە. 

 

لیستی مووچەی وەرگرتووە، ڕاپۆرتی دارایی میزان موراجە‌عەی وەرگرتووە، پاشانیش داهاتی نانەوتی وەرگرتووە و تا ئێرە هیچی نەوتووە و تێبینیشی نییە، کەچی لەدواساتدا دەڵێت، مووچە نانێرین ئەم بڕیارە لە کوێوە هات؟ 

 

ئەمە ڕوونە کە ئەم وەزارەتە و حکومەتی بەغدا بە ئیعازی سیاسی مامەڵە لەگەڵ هەرێمی کوردستان دەکەن، ئەو بانگەوازەی پێشتریش لە بوونی پەڵپی یاسایی هەموو بۆ پاساوی بڕیارە سیاسییەکە بوو، بۆ بەغدا خۆی لەناوەوە بە یاسا مامەڵە دەکات؟! بۆ ئێمە لە سویسڕاین؟

ئێستا کە بە وتەکەی تەیف سامی پشکی کوردستان کۆتایی هاتووە، ئەوا بە یەک تەلەفۆن مووچەی مانگی پێنج و مانگەکانی دیکەش دێت، وەکو هەموو جارێک کە ئەم وەزارەتە بڕیاری دەدا مووچە نەنێرێت و دواتر لە مانگی داهاتوو مووچەی مانگی پێشووی دەنارد!

 

ئەمەش واتا ئەم وەزارەتە تەنها ئیشی لەسەر فشار و دواخستنی مووچە کردووە نەک نەناردنی لەلایەن پسپۆڕانیش وەڵامی ئەم نەمانی پارەیە خرایە مشتی تەیف سامییەوە. 

 

ئەمە ڕاستییەکەیە ئەی چی بکرێت؟ 

ئێستا ڕوون و ڕەوان دیارە کە ئەم کەیسە چەند سیاسییە، وتەی جەنابی سەرۆک مەسعود بارزانی، چەند دروستبوو کە هەر لە سەرەتاوە وتی: ئەم بابەتە سیاسییە و نابێت قووت و مافی فەرمانبەرانی ئێمە بە سیاسی بکرێت. 

تەنانەت ئەوانەش کە ئیشیان داتاشینی پاساوەکانی بەغدایە ئەمجارە قسەیەکیان نییە و بە زمانی خۆیان بابەتی سیاسی دەکەنە هۆکاری نەهاتنی مووچەی مانگی پێنج. 

جا ئێستا کە دەرکەوت ئەم بابەتە سیاسییە ئیتر بۆ مرۆڤی خاوەن شەرەف و خاوەن ئیرادە عەیبە لە کەیسی سیاسیی لایەنی میللەتەکەی خۆی نەگرێت. 

"ئێستا کاتی یەکدەنگییە، کاتی پاساوهێنانەوە و بەهێزکردنی هەڵوێستی لاوازی بەغدا نییە". 

بەغدا لەم کەیسەدا هیچ کات وەک ئێستا لاواز نەبووە، ئەوەتا حکومەتى ویلایەتە یەکگرتووەکانى ئەمەریکا بەپەلە و دەستبەجێ پشتیووانى خۆى بۆ هەرێمى کوردستان ناردووە.

لە بابەتی گرێبەستەکانی ئەم دواییەی وزەدا، هەموو پسپۆڕانی سیاسیی و ئابووری و دەستڕۆیشتووانی ویلایەتە یەکگرتووەکانی ئەمریکا و بەرپرسانی هەرێمیش، دڵنیایی لەسەر ئەوە دەکەنەوە کە ئەم گرێبەستانەی وزە لە قازانجی عێراقە بە گەشتیی، سەرۆکوەزیرانی کوردستانیش زووتر هۆشداریدا چەند نەرم مامەڵە بکەن لە قازانجی خۆیانە ئەم پڕۆژەیەش بۆ قازانجی هەموو عێراقە. 

عێراق ساڵانە ملیاران دۆلار بۆ کڕینی غاز سەرف دەکات، بەم پڕۆژەیە نەک پێویستی خۆی پڕدەکاتەوە بەڵکو دەتوانێت ‌غاز هەناردەی وڵاتانیش بکات. 

ئەم بەرژەوەندییە گەورەیە کە هەمووان دڵنیایی لێدەکەنەوە و ڕوون و ئاشکرایە لە قازانجی عێراقە بەڵام بۆچی کاربەدەستانی عێراق نە خۆیان ئەو کارە دەکەن نە ڕێگەش بە هەرێمی کوردستان دەدەن ئەم بەرژوەندییە بۆ هەموو عێراق دابین بکات؟ 

ئێستا کاتی ململانێی ناوخۆی نییە، ئەوەی ئەو ڕێگەیەی تاقیکردەوە لە هەڵبژاردنی پێشوو دەرکەوت چ هەڵەیەکی کردووە. 

ئێستا کاتی ئەوەیە کە هەمووان بە یەکدەنگ و بە یەک بازوو و ئیرادەوە بەرامبەر ناهەقییەکەی بەغدا بوەستینەوە، جەخت لە مافە دەستوورییەکانمان بکەینەوە بابەتەکە بۆ لیستی مووچە و تەوتین و ئەم بیانووە بچووکە نەکەینەوە، بەڵکو بابەتەکە زۆر لەوە گەورەتر و سیاسیی تر و جیهانی ترە و پێشهاتی دیکەش بەڕێوەیە. 

پێگەی بەغدا ئێستا لە ڕووی سیاسییەوە زۆر لەوە لاوازترە ستایش بکرێت، نوێنەر و لایەن سیاسییە کوردییەکان پێویستە لەم ململانێیەدا بزانن کام بەرەیە دەگرن. 

بەرەی میللەت و قەوارەی خۆت یان بەرەی ئەوانەی دەیانەوێت قەوارەکەی ئێمـەش وەکو عێراقەکەی خۆیان وێران بکەن؟ 

مێژوو ڕەحم بە کەس ناکات و هەڵبژاردنیش نزیکە.