زیادبوونی خواست لەسەر کارەبا وەزارەتی کارەبای عێراق شۆک دەکات

ئاڤا نیوز

 

ئەمساڵ لە عێراق خواست لەسەر کارەبا بەشێوەیەکی چاوەڕواننەکراو زیادی کردووە؛ بەرزبوونەوەکە شەش هێندەی ساڵی ڕابردوو بووە و "وەزارەتی کارەبای شۆک کردووە".

 

ژمارەکان وادەڵێن: خواست بۆ کارەبا لە عێراق 35 - 37 هەزار مێگاواتە، ساڵانە خواست 2.5 هەزار مێگاوات زیاد دەکات. تەنیا لە وەرزی هاوینی ئەمساڵدا خواست گەیشتووەتە 50 هەزار مێگاوات، واتە 15 هەزار مێگاوات زیادی کردووە. 

 

هۆکارە زانراوەکان: تاوەکو ئێستا بە دیاریکراوی هۆکاری ئەو بەرزبوونەوەیە نازانرێت، بەڵام وەزارەتی کارەبا پێیوایە بەرزبوونەوەی خواست بۆ زیادبوونی باڵەخانە و کۆمەڵگەکانی نیشتەجێبوون دەگەڕێتەوە. 

 

لێدوانی فەرمی: ئەحمەد مورتەزا، جێگری بەڕێوەبەری کۆمپانیای گشتیی دابەشکردنی کارەبای بەغدا دەڵێت، وەزارەتی کارەبا چەندین رێوشوێنی گرتووەتەبەر بۆ ئەوەی چارەسەری بارزۆری سەر هێڵەکانی کارەبا بکات، ئەو دۆخەی روویداوە بۆ وەزارەتی کارەباش شۆکهێنەرە.