دوو داوا لە دەستەی دەستپاکییەوە بۆ دادگە لەبارەی نوور زوهێرەوە

ئاڤا نیوز

 

دەستەی دەستپاکیی عێراق دوو داواکاری پێشکەش بە دادگەی ناوەندیی بەرەنگاربوونەوەی گەندەڵی لە بەغدا کرد؛ بۆ ئەوەی بڕیارێک دەربکات لە ڕێگەیەوە دەستبەسەر پارەکانی نوور زوهێر، تۆمەتباری سەرەکیی 'دزیی سەدە' بگیرێت و هێڵی سووری بەسەردا بهێنرێت.

 

وێنە گەورەکە: دۆسیەی ئاسانكاریكردن بۆ بردنە دەرەوەی بڕی 2.5 ملیار دۆلار لە بانکی ڕافیدەین وەک یەكێک لە گەورەترین سكانداڵەكانی گەندەڵی دارایی لە عێراق کە بە "دزیی سەدە" ناسراوە، چەندین کەس دراونەتە دادگا و دادگایی کراون.

 

لێدوانی فەرمی: حەیدەر حەنوون، سەرۆکی دەستەی دەستپاکیی عێراق ئاژانسی هەواڵی عێراقی ڕایگەیاند: ئەو دوو داواکارییە لە دادگا لە ژێر لێکۆڵینەوەدان و دوای وەرگرتنی بڕیارەکە دەستبەجێ دەست دەکەین بە تەواوکردنی ڕێوشوێنەکانی هێڵی سوور و گشتاندنی ئەو بڕیارە بۆ وڵاتان بۆ ئەوەی دەست بەسەر پارەکانی لە ناوخۆ و دەرەوەدا بگرین."

 

ئەمەش بزانە: بڕیاربوو ڕۆژی 27 ی ئاب پرۆسەی دادگەییکردنی تۆمەتبارانی سەرەکی لە دادگا بەڕێوەبچێت، بەڵام هیچ یەکێک لە تۆمەتبارەکان ئامادەی دادگەییەکە نەبوون و دادگە فەرمانی دەستگیرکردنی بۆ هەردوو تۆمەتبار نوور زوهێر و هەیسەم جبووری دەرکرد.