نزیکەی 250 هەزار کەس سەرپێچییان لە سیستمی پاراستنی کۆمەڵایەتی کردووە

ئاڤا نیوز

 

دەستەی دەستپاکیی عێراق، 242 هەزار و 820  خاوەنکار و ئەندامانی خێزانی فەرمانبەرانی وەزارەتەکانی حکومەتی عێراق جگە لە هەرێمی کوردستان سەرپێچییان لە سیستمی پاراستنی کۆمەڵایەتییان کردووە.

 

وێنە گەورەکە: سیستمی پاراستنی کۆمەڵایەتی, بریتییە لە تەرخانکردنی مووچەی مانگانە بۆ بەشێک لە هاووڵاتیان:- نەخۆش و خاوەن پێداویستیی تایبەت و هەژاران، بەڵام بەشێکی زۆر لە هاووڵاتیان بە تایبەتی کەسوکاری فەرمانبەرانی حکومەت بە ناڕەوا ئەو مووچەیە وەردەگرن.

 

ڕاگەیێنراوی فەرمی: دەستەی دەستپاکیی عێراق ڕایگەیاند: بەپێی سەردانیکردنی تیمەکانی دەستەکە بۆ بەڕێوەبەرایەتییەکانی وەزارەتی کار و کاروباری کۆمەڵایەتی، لە ساڵی 2023دا دوو هەزار و 167 سەرپێچیکردن لە بابەتی پاراستنی کۆمەڵایەتی کراوە لە بەغدا.

 

زانیاریی زیاتر: دەستەکە ڕەخنە لە بەڕێکردنی مامەڵەی هاووڵاتیان دەگرێت کە زۆرجار درەنگ دەکەوێت و دەشڵێت: بەشێک لە هاووڵاتیان گلەییان هەیە.

 

ئەوەی پێویستە بیزانیت: بەپێی دەستەی پاراستنی کۆمەڵایەتیی عێراق، حەوت ملیۆن و 600 هەزار هاووڵاتی چاودێریی کۆمەڵایەتی دەیانگرێتەوە و مانگانە 470 ملیار دینار خەرج دەکرێت بۆ دابینکردنی مووچەی پاراستنی کۆمەڵایەتی.