وەزارەتی پلاندانانی عێراق وردەکاریی سەرژمێری بۆ ئاڤا دەخاتەڕوو

ئاڤا نیوز

 

سەرژمێری گشتیی هاووڵاتییانی بیانیش دەگرێتەوە و ئاماری نەخۆشییە درێژخایەن و خاوەن پێداویستی تایبەتیش یەکلادەبێتەوە.

 

وێنە گەورەکە: بڕیارە لەمڕۆ شەممەوە پرۆسەی سەرژمێری گشتیی لە سەرتاسەری عێراق بە هەرێمی کوردستانیشەوە بەڕێوەبچێت تاوەکو 22 ئەم مانگەوە، ئەنجامە سەرەتاییەکانی پرۆسەکەش دوای شەش هەفتە ئاشکرا دەکرێت.

 

لێدوانی فه‌رمی: عەبدولزەهره هنداوی، گوتەبێژی وەزارەتی پلاندانانی عێراق بە ئاڤا نیوزی ڕاگەیاند: پرۆسەی سەرژمێری گشتیی تەنیا هاووڵاتییانی عێراقی ناگرێتەوە، بەڵکو سەرجەم ئەو کەسانە دەگرێتەوە کە ئێستا لە عێڕاق نیشتەجێن و هەڵگری ڕەگەزنامەی وڵاتانی دیکەن.

 

زانیاریی زیاتر: هەر هاووڵاتییەك لە شوێنی نیشتەجێبوونی ئێستای خۆی دەتوانێت بەشداریی پرۆسەی سەرژمێری گشتیی بكات، هۆکاری گواستنەوەی لەپارێزگایەکەوە بۆ پارێزگایەکی دیکە تۆمار بكات، ئاخۆ هۆکارەکە، ئەمنییە، کۆمەڵایەتییە، هەلی کارە یاخود ئارەزوومەندانەیە ، هنداوی ئەمەشی گوت.

 

قووڵتر: بە گوتەی هنداوی، بابەتی پێدانی زانیاریی دروست بە تیمە گەڕۆکەکان لەلایەن ئەو کەسانەی نەخۆشی دریژخایەنیان هەیە، یاخود خاوەن پێداویستی تایبەتن، زۆر گرنگە بۆ ئەوەی پشت بەو ئامارە ببەستری بۆ هەر خزمەتگوزاریەک و کارێکی پێویست.