ڕێگەیەکی کاتی بە بەنداوی گۆمەسپاندا دروست دەکرێت

دوێنێ شەممە بەهۆی بارانبارینی زۆر و بەرزبوونەوەی ئاستی ئاو لە بەنداوەکەدا، ڕێگەی سەرەکیی هەولێر - سنووری ئیدارەی ڕاپەڕین داخرا. سەرپەرشتیاری جێبەجێكردنی کاری بەنداوی گۆمەسپان گوتی، لە هەفتەی داهاتوودا ڕێگەیەکی کاتی دروست دەکەین. 

 

بۆچی ئەم بابەتە گرنگە: بەنداوی گۆمەسپان یەکێکە لە گرنگترین پرۆژەکانی پارێزگای هەولێر. ڕێگەی سەرەکی هەولێر - ڕانیە و هەولێر - سلێمانی لەسەر بەنداوی گۆمەسپانن، بەڵام بەهۆی بارانبارین و بەرزبوونەوەی ئاستی ئاو لە بەنداوەکەدا دوێنێ داخرابوون.

 

لێدوانی فەرمی: عەبدوڵا گەردی، سەرپەرشتیاری جێبەجێكردنی کاری بەنداوی گۆمەسپان، بە ئاڤا میدیای راگەیاند، ئێستا کار دەکەین بۆ دابینکردنی رێگەیەکی کاتی بۆ بەردەوامی هاتووچۆ بە بەنداوی گۆمەسپان و هەفتەی داهاتووش رێگە کاتییەکە دەکرێتەوە.

"بەڵام رێگەی سەرەکی نابێت و کاتییە، دوای تەواوبوونی بەنداوەکە کە ئێستا لە 65%ی تەواو بووە، رێگەیەکی سەرەکی و جێگیر بە دەوری بەنداوەکەدا دەکەینەوە" عەبدوڵا گەردی وای گوت.

 

زانیاریی زیاتر: بەنداوی گۆمەسپان گەورەترین بەنداوە لە سنووری پارێزگای هەولێر و سێیەم گەورەترین بەنداوە لەسەر ئاستی هەرێمی كوردستان، لە دوای هەردوو بەنداوی دوكان و دەربەندیخان لە سنووری پارێزگای سلێمانی.

تێچووی پرۆژەكە 95 ملیار دینارە و بەرزییەكەی 70 مەتر و درێژییەكەی 512 مەترە، توانای گلدانەوە و ئەمباركردنی 115 ملیۆن مەتر سێجا ئاوی بارانی هەیە و ڕووبەرەكەی شەش ملیۆن و 125 هەزار مەتر سێجایە.