ئەمریکا داوای پشکنینی فڕۆکە ئێرانییەکان لە فڕۆکەخانەکانی عێراق دەکات

ئاڤا نیوز

 

بەپێی سەرچاوەیەکی ئەمنیی عێراق، هەنگاوەکانی ئەمریکا بۆ پشکنینی فڕۆکە مەدەنی و بازرگانییەکانی ئێران لە هەردوو فڕۆکەخانەی بەغدا و نەجەف و کۆنتڕۆڵکردنی تەواوی دەروازە سنوورییه وشکانییەکانی نێوان عێراق و ئێران دەستیپێکردووە.

 

چیرۆکی سەرەکی: دوای ئەوەی ئەمریکا گەمارۆی نوێی خستە سەر پێنج بانکی عێراقی بە تۆمەتی بەقاچاخ بردنی دۆلار بۆ ئێران، هاوکات لەگەڵ قەدەغەکردنی نیشتنەوەی فڕۆکەی مەدەنی ئێرانی لە فڕۆکەخانەی ڕەفیق حەریری لە بەیرووت و ئاڵۆزیی پەیوەندییەکانی نێوان لوبنان و ئێران، ئەمریکا بەنیازە گەمارۆی زیاتر بەسەر ئێران لە ڕێگەی عێراقەوە بسەپێنێت.

 

زانیاریی بەدەستهاتوو: سەرچاوەیەکی ئەمنیی عێراقی ڕایگەیاند: ئەمریکا زانیاریی هەواڵگری لەبەردەستە ، ئێران لەڕێگەی فڕۆکەخانەکان و دەروازە سنوورییەکانی  عێراقەوە هەوڵی گواستنەوەی چەک و کەرەستەی سەربازی  بۆ حزبوڵڵای لوبنان دەدات.

 

لەلایەکی دیکەوە: بەرپرسێکی باڵای سیاسی لە ڕەوتی نیشتمانی شیعە کە موقتەدا سەدر ڕابەرایەتی دەکات ئاشکرایکرد، بەرپرسانی عێراق لایەنی ئەمریکییان ئاگادارکردووەتەوە لەوەی عێراق ئامادەنییە هەمان سیناریۆی لوبنان لە فڕۆکەخانەی نێودەوڵەتی بەغدا و نەجەف بەرامبەر بە فڕۆکە بازرگانی و مەدەنیەکانی ئێران دووبارە بکاتەوە.