داوا دەکرێت دەرماڵەی مامۆستایان بۆ 300 هەزار دینار زیاد بکرێت

ئاڤا نیوز

 

لیژنەی پەروەردە لە پەرلەمانی عێراق ڕایگەیاند، پشتیوانیی لە داواکاریی مامۆستایان دەکەن و داوایان لە حکومەت کردووە دەرماڵەی پیشەیی مامۆستایان لە 150 هەزار دینارەوە بۆ 300 هەزار دینار زیاد بکرێت.

 

بۆچی گرنگە: ڕۆژی 6ی نیسان کە هاوکات بوو لەگەڵ یەکەم ڕۆژی دەوام لە دوای پشووەکانی جەژنی ڕەمەزان، مامۆستا و فەرمانبەرانی وەزارەتی پەروەردە لە هەموو پارێزگاکانی عێراق بایکۆتی دەوامیان کرد و داوای زیادکردنی مووچە، دابینکردنی یەکەی نیشتەجێ بوون و زیادکردنی دەرماڵەی پیشەیی و خێزان و منداڵ و چەند داواکارییەکی دیکەیان کرد.

 

لێدوانی فەرمی: تەعمە لهێبی، ئەندامی لیژنەی پەروەردە لە پەرلەمانی عێراق بۆ ڕۆژنامەی سەباح:

- لیژنەکەمان پشتیوانیی لە زیادکردنی دەرماڵەی پیشەیی مامۆستایان دەکات لە 150 هەزار دینار بۆ 300 هەزار دینار.

- پشتیوانیی لە زیادکردنی مووچەی بنەڕەتی بەڕێژەی 100% دەکەین، ئەویش بە ئامانجی باشترکردنی دۆخی ژیانی مامۆستایان و فەرمانبەرانی پەروەردە.

- داوای زیادکردنی دەرماڵەی هاوسەرگیریی مامۆستایان لە 50 هەزار بۆ 100 هەزار دینار دەکەین.

- داوامانکردووە دەرماڵەی هاتووچۆ بۆ دەرەوەی شار لە 60 هەزارەوە بکرێت بە 90 هەزار دینار، بۆ ناوشاریش داوامانکردووە دەرماڵەکە لە 30 هەزارەوە بکرێت بە 70 هەزار دینار.