شاخەوان عەبدوڵڵا: بەغدا هەنگاوی کرداریی بۆ قەرەبووکردنەوەی قوربانیانی ئەنفال نەناوە

ئاڤا نیوز

جێگری سەرۆکی پەرلەمانی عێراق بە ئەرکی "ئەخلاقی و یاسایی" پەرلەمانی عێراقی دەزانێت پشتگیری قەرەبووکردنەوەی کەسوکاری ئەنفالکراوان و زیانلێکەوتووان بکات و دەشڵێت، بەرپرسیاریێتی هەرە گەورە لەبەردەم حکومەتی فیدراڵییە بۆ قەرەبووکردنەوەی کەسوکاری ئەنفالکراوان و زیانلێکەوتووان.
 
وێنە گەورەکە: ئەمڕۆ یادی 37 ساڵەی شاڵاوە بەدناوەکانی ئەنفالە کە ڕژێمی بەعسی ڕووخاو دژ بە خەڵک و خاک و ژینگەی کوردستان ئەنجامیدا و لە زنجیرەیەک شاڵاوی بەدوای یەکدا دەیان هەزار خەڵکی بێتاوانی کوردستانی ڕاپێچی بیابانەکانی باشوور و ناوەڕاستی عێراق کرد و لەگۆڕی بەکۆمەڵدا زیندەبەچاڵ و بێسەروشوێنی کردن.

 

لێدوانی ڕۆژنامەوانی: شاخەوان عەبدوڵڵا، جێگری سەرۆکی پەرلەمانی عێراق لە کۆنگرەیەکی ڕۆژنامەوانیدا ڕایگەیاند، ئەرکێکی ئەخلاقی و یاسایی لەسەر پەرلەمانی عێراقە بۆ پشتگیرکردنی قەرەبووکردنەوەی کەسوکاری ئەنفالکراوان و زیانلێکەوتووان، بەرپرسیاریێتی هەرە گەورەش لەبەردەم حکومەتی فیدراڵییە بۆ قەرەبووکردنەوەی کەسوکاری ئەنفالکراوان و زیانلێکەوتووان چ بە گەڕاندنەوەی ڕووفاتەکانیان و چ لە ڕێگەی ئاوەدانکردنەوەی گوندەکانیان، کە بەداخەوە دوای 20 ساڵ هیچ جۆرە قەرەبووکردنەوەیەک نەیانی گرتووەتەوە.

 

لەلایەکی دیکەوە: پەیوەست بە پرسی دەنگدان بە پارێزگابوونی هەڵەبجە کە لە کارنامەی دانیشتنی ئەمڕۆی پەرلەمانە، جێگری سەرۆکی پەرلەمانی عێراق داوای لە سەرجەم فراکسیۆنەکان کرد دەنگ بە پارێزگابوونی هەڵەبجە بدەن و ئاماژەی بەوەشکرد هەڵەبجەییەکان ئەمڕۆ چاوەڕێی ئەوەن پەرلەمانتاران لەسەرجەم فراکسیۆنەکان بە گیانێکی نیشتمانی بڕواننە ئەم پرسە و دەنگی بۆ بدەن.