کۆریای باکوور و ڕووسیا ڕێککەوتنامەی بەرگریی هاوبەش جێبەجێدەکەن

ئاڤا نیوز

سکرتێری ئەنجوومەنی ئاسایشی ڕووسیا بەسەردانێکی فەرمی گەیشتە پیۆنگ یانگی پایتەختی کۆریای باکوور.  هەردوو وڵات جەخت لەسەر جێبەجێکردنی چەند بەندێکی دیکەی ڕێککەوتنامەی بەرگریی هاوبەش دەکەنەوە.

وێنە گەورەکە: لەسەردانە مێژووییەکەی ساڵی ڕابردووی ڤلادیمێر پووتین، سەرۆکی ڕووسیا بۆ پیۆنگ یانگ، ڕێککەوتنی بەرگریی هاوبەش لە نێوان ڕووسیا و کۆریای باکوور واژۆکرا، لە 28-4-2025 کۆریای باکوور بە فەرمی ناردنی هێزی پشتیوانیی سەربازی بۆ ڕووسیا لە جەنگی ئۆکراینا ڕاگەیاند.

بڵاوکراوەی فەرمی: نوسینگەی ڕاگەیاندنی ئەنجوومەنی ئاسایشی ڕووسیا لە بڵاوکراوەیەکی فەرمیدا ڕایگەیاند: کۆبوونەوەکانی سێرگیۆ شویگۆ، سکرتێری ئەنجومەنی ئاسایشی ڕووسیا لە پیۆنگ یانگ جەخت دەکاتەوە لەسەر جێبەجێکردنی چەند بەندێکی دیکەی ڕێککەوتنامەی بەرگریی هاوبەشی نێوان ڕووسیا و کۆریای باکوور، هەروەها ڕێوڕەسمی یادکردنەوەی سەربازە کوژراوەکانی کۆریای باکوور لە ڕزگارکردنی هەرێمی کۆرسکی ڕووسی ئەنجام دەدرێت.

ئەوەی پێویستە بیزانیت: بەپێی ڕاپۆرتە ڕۆژنامەوانییەکان لە شەری ئۆکراینا زیاتر لە 600 سەربازی کۆریای باکوور کوژراون و سەدانی دیکەش برینداربوون.