سوودانی بۆ حاجییە عێراقییەکان: خزمەتکردنتان ئەرکی ئێمەیە لە هەر کوێیەک بن

ئاڤا نیوز

سەرۆکوەزیرانی عێراق لە پەیوەندییەکی تەلەفۆنیدا بەدواداچوون بۆ دۆخی حاجییە عێراقییەکان لە سعودیە دەکات و ڕایدەگەیێنیت، "خزمەتکردنتان ئەرکی ئێمەیە لە هەر کوێیەک بن".

 

وێنە گەورەکە: ئەمساڵ لە عێراق و هەرێمی کوردستان زیاتر لە 30 هەزار کەس بە مەبەستی بەجێهێنانی فەریزەی حەج سەردانی سعودیەیان کردووە، دوای وەستان لە کێوی عەرەفە، یەکێک لە پایە گرنگەکانی حەجیان ئەنجامدا و حاجیان گەڕانەوە مینا.

 

ڕاگەیێنراوی فەرمی: بەگوێرەی ڕاگەیێنراوی نووسینگەی محەممەد شیاع سوودانی، سەرۆکوەزیرانی عێراق، سوودانی لەمیانی پەیوەندییەکەدا جەختی لەسەر بەردەوامبوون لە خزمەتکردنی عێراقییەکان لە هەموو شوێنێک کردەوە.

 

لە هەمان کاتدا: ئاماژەی بەوەشکردووە، "پابەندبوونی دەستەی حەج بە ڕێنماییەکانەوە، کارئاسانی بۆ کردوون لە پێشکەشکردنی خزمەتگوزاری بە حاجییەکان".

 

لەلایەکی دیکەوە: ئەم پەیوەندییەی سوودانی لە کاتێکدایە، ئەمڕۆ لە دووەم ڕۆژی جەژنی قوربان، بەشێک لە حاجیانی عێراق لە ژێر خێمەکانی مینا گلەییان لە پێشکەشکردنی ئەو خزمەتگوزریانە هەبوو، کە پێشکەش بە عێراقییەکان کراوەوە و کەسێک ڤیدیۆی ژێر خێمەکەی خۆیانی گرتووە و باس لە خراپی خزمەتگوزارییەکان دەکات.