لە ئێران فەتوای کوشتنی ترەمپ دەدرێت

ئاڤا نیوز

بە گوێرەی ڕاپۆرتێکی ئاژانسی فۆکس نیوزی ئەمریکی، لە ئێران فەتوای کوشتنی دۆناڵد ترەمپ، سەرۆکی ئەمریکا دراوە و دەستکراوە بە کۆکردنەوەی پارە بۆ جێبەجێکردنی فەتواکە.

زانیاریی بەدەستهاتوو: فۆکس نیوز پشتی بە ڕاپۆرتێکی دامەزراوەی 'یەکێتیی لە دژی ئێرانی ئەتۆمی' بەستووە کە تێیدا بابەتەکەی خستووەتە ڕوو و هاوکات داوای لە حکومەتی ئەمریکا کردووە سزا بەسەر ئەو کەسانەدا بسەپێنێت کە لە دەرکردنی ئەم فەتوایە و کاکردن بۆ جێبەجێکردنی دەستیان هەیە، لەوانەش چەند زانایەکی ئایینیی گەورە و دامەزراوەکان سەر بە ئێران کە فەتواکەیان بۆ کوشتنی ترەمپ و هاووڵاتیانی دیکەی ئەمریکا وەک سەلمان ڕوشدی، نووسەری ئەمریکی و هەروەها بنیامین نەتەنیاهۆ، سەرۆکوەزیرانی ئیسرائیل دەرکردووە.

زانیاریی زیاتر: فەتواکە لەسەر بنەمای ئەوە دەرکراوە کە ترەمپ و نەتەنیاهۆ 'موحاریب'ـن، واتە شەڕیان لە دژی خودا دەستپێکردووە. ئەم زاراوەی موحاریبە لە ئێران تۆمەتێکە کە ئەگەر لە سەر کەسێک ساغ بێتەوە سزاکەی لەسێدارەدانە.

دامەزراوەکە 11 کەسی دەستنیشان کردووە کە ڕۆڵیان لەم فەتوایەدا هەبووە و داوایکردووە ئەمریکا بە گوێرەی یاسای دژە تیرۆر سزایان بدات. لە ناو ئەو کەسانەدا، چەند ئایەتۆڵایەکی گەورەی ئێرانی هەن، وەک ئایەتوڵڵا مەکارمی شیرازی، ئایەتوڵڵا حوسێن نوری هەمەدانی و ئایەتوڵڵا موحسین ئەراکی، هەروەها داواش کراوە سزا بخرێتە سەر دامەزراوەی میدیایی فەرمیی ئێران کە پڕۆگرامێکی تەلەڤیزیۆنی پەخش کردووە و تێیدا بەڵێنی 10 تا 20 ملیۆن دۆلاری وەک پاداشت لە بەرامبەر سەری ترەمپ داناوە.