لەماوەی شەش مانگدا زیاتر لە حەوت هەزار ژوانی نێوان هاوسەران لە چاکسازییەکان بەستراون

ئاڤا نیوز

بەڕێوەبەرایەتی گشتی چاکسازییەکانی هەرێمی کوردستان ئاماری شەش مانگی ئەمساڵی چاکسازییەکانی بڵاوکردەوە، کۆی بەندکراوانی هاتوو چوار هەزار و 66 کەس بوون، زیاتر لە حەوت هەزار ژوانیش بەستراون.

وێنە گەورەکە: ماوەی چەند ساڵێکە شوێنێکی تایبەت لە چاکسازییەکان تەرخانکراوە وەک ژوانگەیەک بۆ ژوانی هاوژینان تایبەت بەو کەسانەی لە چاکسازییەکاندا سزاکانیان بەسەر دەبەن، ئەمەش لە پێناو کەمکردنەوەی ڕێژەی جیابوونەوەی هاوژینان.

لێدوانی فەرمی: ئیحسان عەبدولڕەحمان، بەڕێوەبەرایەتی گشتی چاکسازییەکانی هەرێمی کوردستان دەڵێت، "شەش مانگی یەکەمی ساڵی 2025 لە چاکسازییەکانی هەرێمی کوردستان، حەوت هەزار 144 کەس ژوانیان لەنێو چاکسازییەکان بەستووە لەکۆی پێنج هەزار و 760 بەندکراو."

لەلایەکی دیکەوە: لەکۆی بەندکراوان هەزار و 579 کەس کەیسەکەیان ماددەی هۆشبەرە، لەماوەی شەش مانگدا 244 کەس بۆ ماوەی سێ مانگ خولییان بینیوە لە سەنتەرەکانی شیاندنەوە بەشداربوون و چارەسەریان بۆ کراوە.