سوودانی لەبارەی هێرشە درۆنییەکان پەیام بۆ کۆمپانیا ئەمریکی و نێودەوڵەتییەکان دەنێرێت

ئاڤا نیوز

 

محەممەد شیاع سوودانی، سەرۆکوەزیرانی عێراق لەبارەی هێرشە درۆنییەکانی سەر کێڵگە نەوتییەکانی کوردستان دڵنیایی دەدات و دەڵێت، "پاراستنی کۆمپانیا ئەمریکی و نێودەوڵەتییەکان ئەرکی حکومەتە و دەبێت بە زووترین کات بەرهەمهێنانی نەوت ئاسایی بکرێتەوە".

 

چیرۆكی سەرەكی: هەفتەی ڕابردوو هێرشی درۆنی كرایە سەر ژێرخانی وزەی هەرێمی کوردستان، بەهۆیەوە کارکردن لە پێنج کێڵگەی نەوتی وەستا، ئەوانەی دیکەش بەهۆکاری ئەمنی کارکردنیان سنووردار کرد، بەجۆرێک ئاستی بەرهەمهێنانی نەوت بۆ نزیکەی 81 هەزار بەرمیل نەوتی ڕۆژانە دابەزی.

زانیاریی بەدەستهاتوو: بەپێی زانیارییەکانی سەرچاوەیەکی باڵای حکومەتی عێراق کە بەشداری کۆبوونەوەکەی کردووە و قسەی بۆ ئاڤا کردووە، سوودانی داوای لە وەزارەتی نەوت کردووە، ڕاپۆرتێکی بەپەلەی پێ بدەن لەبارەی دۆخی کێڵگە نەوتییەکانی هەرێمی کوردستان.

پەیام بۆ کۆمپانیاکان دەنێرێت: هەروەها سەرۆکوەزیرانی عێراق جەختی کردووەتەوە و وتوویەتی: "پەیامێک بە کۆمپانیا ئەمریکی و نێودەوڵەتییەکان بدەن، ئەوانەی لە کەرتی نەوتی کوردستان کار دەکەن، با دەست بە کارکردن بکەنەوە، پارێزراو دەبن."

زانیاریی زیاتر: لە بەشێکی دیکەی کۆبوونەوەکەدا، سوودانی لە حەیان عەبدولغەنی، وەزیری نەوتی  عێراقی پرسیوە کە چەند کات پێویستە بۆ ئەوەی بەرهەمهێنانی نەوتی هەرێمی کوردستان بگەڕێتەوە ئاستی ئاسایی خۆی. لە وەڵامدا، وەزیری نەوت ڕایگەیاندووە: "لە ماوەی مانگێکدا دۆخی بەرهەمهێنانی نەوتی هەرێمی کوردستان بە تەواوی ئاسایی دەبێتەوە."

بۆ ڕووبەڕووبوونەوەی هەڕەشەکان، سوودانی وتوویەتی: "پێمباشە لە کۆبوونەوەی داهاتووی ئەنجوومەنی ئاسایشی نەتەوەیی عێراقدا، باسی هێرشە درۆنییەکان و ڕێکارەکانی ڕاگرتنیان بکرێت." ئەمە لە کاتێکدایە کە هەر دوێنێ شەو، چوارچێوەی هەماهەنگی لە کۆبوونەوەی خۆیدا ئیدانەی ئەو هێرشانەی کردبوو.

لەلایەکی دیکە: سوودانی لیژنە وەزارییەکەی نێوان هەولێر و بەغدای ڕاسپاردووە کە بەوردی چاودێریی جێبەجێکردنی ڕێککەوتننامەی نێوان هەردوولا بکەن لەبارەی دۆسیەی نەوت و مووچەوە.

ئەوەی پێویستە بیزانیت: جێگەی باسە، بەهۆی هێرشە درۆنییەکانەوە، لە ئێستادا توانای بەرهەمهێنانی نەوتی هەرێمی کوردستان بۆ نزیکەی 81 هەزار بەرمیل لە ڕۆژێکدا کەم بووەتەوە. بەپێی ڕێککەوتنی هەولێر و بەغدا، 50 هەزار بەرمیلی بۆ بەکاربردنی ناوخۆیی تەرخان دەکرێت و بڕی زیادەش ڕادەستی کۆمپانیای بەبازاڕکردنی نەوتی عێراق (سۆمۆ) دەکرێت. بڕیاریشە هەر زیادبوونێک لە ئاستی بەرهەمهێناندا لە داهاتوودا، ڕادەستی سۆمۆ بکرێت.