هەڵگرانی نازناوی زانستی ئەگەر لە پشووی هاویندا دەوامیان كردبێت بۆیان قەرەبوو دەكرێتەوە

ئاڤا نیوز

هەڵگرانی نازناوی زانستی سەر بە میلاكی وەزارەتی خوێندنی باڵا و توێژینەوەی زانستی، مانگەكانی حەوت و هەشت، واتە بۆ ماوەی 60 ڕۆژ پشووی فەرمییانە و ئەگەر لەو دوو مانگەدا بە هەر هۆكارێك لە زانكۆكان دەوامیان كردبێت، ئەوا بۆیان قەرەبوو دەكرێتەوە.


وێنە گەورەكە: پاڵپشت بە بڕگەی سێیەم لە ماددەی 10ـی یاسای ڕاژەی زانكۆیی ژمارە 23ـی ساڵی 2008ـی هەمواركراو و بڕگەی یەکەم و دووەم لە ماددەی هەشتی ڕێنمایی ژمارە 7ـی ساڵی 2015ـی وەزارەتی دارایی و ئابووریی هەرێمی كوردستان، فەرمانبەری خزمەتی زانكۆیی كە هەڵگری نازناوی زانستین، شایستەی مۆڵەتی 60 شەست ڕۆژن لە ساڵێكدا.

نووسراوی فەرمی: بەگوێرەی نووسراوێكی وەزارەتی خوێندنی باڵا و توێژینەوەی زانستیی حكومەتی هەرێمی كوردستان كە وێنەیەكی دەست ئاڤا میدیا كەوتووە، گشتاندن بۆ سەرجەم زانكۆ حكومییەكان و فەرمانگەكانی دیكەی سەر بە وەزارەت كراوە، تێیدا هاتووە، فەرمانبەرانی خزمەتی زانكۆیی كە هەڵگری نازناوی زانستین، شایستەی مۆڵەتن بۆ ماوەی 60 ڕۆژ لە مانگەكانی 7 و 8، ئەگەر بەشێوەی تەكلیف لەو دوو مانگەدا دەوامیان كردبێت، ئەوا شایستەی قەرەبووكردنەوە دەبن بە یەكێك لەو دوو بڕگەی خوارەوە:

یەكەم: ئەوانەی پۆستی كارگێڕییان هەیە بۆ نموونە بەڕێوەبەر ئەوا دەتوانن لە ماوەی ساڵێكدا هەمان ئەو ماوەیە واتە 60 ڕۆژ مۆڵەت وەربگرنەوە بە مووچەی تەواو و دەرماڵەكانەوە، یاخود یەك مانگ بەسەریەكەوە و مانگێكیش بەشێوەی خولاوە.

دووەم: ئەوانەی پۆستی كارگێڕییان نییە و لە مانگەكانی 7 و 8 بۆ ئەنجامدانی كارێك ڕاسپێردراون، ئەوا ڕۆژانە 5 كاتژمێر كاری زیادەیان بۆ هەژمار دەكرێت بە مەرجێك لە 15 ڕۆژ كاركردن تێپەڕنەكات یاخود لە 75 سەعات كاركردن تێپەڕنەكات لە ماوەی ئەو دوو مانگەدا.