لە کەناراوەکانی یۆنان بەهۆی وەرگەڕانی بەلەمێکی کۆچبەرانەوە ژنێک گیانی لەدەست دا

ئاڤا نیوز

 

بەلەمێکی کۆچبەران لە کەناراوەکانی یۆنان وەرگەڕا و بە هۆیەوە ژنێک گیانی لەدەست دا. 

 

چیرۆکی سەرەکی: بەلەمەکە لە نزیک دورگەی لێسبۆس وەرگەڕاوە. تیمەکانی پاراستنی کەناراوەکانی یۆنان بەهانایەوە چوون و توانیویانە 17 کەس لە سەرنشینانی بەلەمەکە ڕزگار بکەن، بەڵام ژنێک خنکاوە.

 

زانیاریی زیاتر: ژمارەیەکی زۆر لە کۆچبەرانی ڕۆژهەڵاتی ناوەڕاست و باکووری ئەفریقا ڕێگەی یۆنان بۆ گەیشتن بە وڵاتانی دیکەی ئەوروپا بەکار دەهێنن کە ڕێگەیەکی مەترسیدارە.

 

ئەمەش بزانە: حکومەتی یۆنان ڕێکارەکانی خۆی بۆ ڕووبەڕووبوونەوەی کۆچبەران تووندتر کردووە. هاوکات بە گوێرەی یاسایەکی نوێ، کە مانگی ڕابردوو لە پەرلەمانی ئەو وڵاتە پەسەند کرا، سزای چوونەناوەوەی نایاسایی بۆ ناو یۆنان و مانەوە لەو وڵاتەدا بە بەندکردن لە دوو تا پێنج ساڵ دیاری کراوە.