ناوەڕۆکی نامەیەکی عەلی سیستانی بۆ حەسەن نەسروڵڵا ئاشکرا دەبێت

ئاڤا نیوز

لە پەرەسەندنێکی گرنگدا، ئایەتوڵڵا عەلی سیستانی، مەرجەعی باڵای ئایینی شیعەکان لە نەجەف، چەند هەفتەیەک پێش کوژرانی، نامەیەکی هۆشداری ئاراستەی حەسەن نەسروڵڵا، ئەمینداری گشتی پێشووی حیزبوڵڵای لوبنان، کردووە. ئەم نامەیە، کە ناوەڕۆکەکەی لەلایەن کەسایەتییەکی ئایینی شیعەوە بۆ ڕۆژنامەی شەرقولئەوسەت ئاشکرا کراوە، باس لە مەترسییەکانی شەڕ و پێویستی پاراستنی گیانی هاووڵاتییانی مەدەنی لە لوبنان دەکات.

زانیاریی بەدەستهاتوو: بەگوێرەی ڕاپۆرتێکی ڕۆژنامەی شەرقولئەوسەت، نامەکەی سیستانی بەتایبەتی دوای تەقاندنەوەی ئامێرەکانی پەیجەر بۆ نەسروڵڵا نێردراوە، کە لەو کاتەدا لە دەستی ئەندام و لایەنگرانی حیزبوڵڵادا بوون و لەناکاو لەلایەن ئیسرائیلەوە تەقێنرانەوە. ئەم ڕووداوە بووە هۆی کوژرانی نۆ کەس و برینداربوونی 2700 کەسی دیکە لە بەیرووت و باشووری لوبنان، کە بووە هۆی نیگەرانییەکی زۆر لەبارەی ئاڵۆزییەکانی ناوچەکە.

زانیاریی زیاتر: کەسایەتییە ئایینییە شیعەکە، کە خۆی گوێبیستی ناوەڕۆکی پەیامەکەی ئایەتوڵڵا سیستانی بووە لە کۆبوونەوەیەکدا کە نزیکەی یەک هەفتە دوای تەقاندنەوەی پەیجەرەکان بووە، ڕایگەیاندووە کە سیستانی لە نامەکەیدا داوای کردووە کە "ئەولەویەت پاراستنی ئیماندارانی شیعە و تەواوی خەڵکە مەدەنییەکە بێت لە لوبنان."

سیستانی لە نامەکەدا بە ڕوونی ئاماژەی بەوەداوە کە "دەستدرێژی بۆ سەر لوبنان سنووری نییە، شەڕەکەیش هیچ ڕێسایەکی نییە و هیچ پابەند بوون بە ئەخلاق و ڕێساکانی شەڕی تێدا نییە، دەبێ بەرپرسیاریێتی پاراستنی گیانی خەڵکە مەدەنییەکە لە ئەستۆ بگیرێت." هەروەها دووپاتی کردووەتەوە کە "دەبێ هەر بڕیارێک دەدەن لە بەرژەوەندی ئیمانداران بێت، لوبنان نەخزێندرێتە ناو شەڕێکەوە کە خزمەتی بەرژەوەندی ئەجێندای دەرەکی بکات و نەهامەتی خەڵکەکەیشی زیاتر بکات."

لەلایەکی دیکەوە: کەسایەتییەکی دیکەی ئایینی شیعە ڕوونی کردووەتەوە کە نامەکەی ئایەتوڵڵا سیستانی وەک "ئامۆژگارییەک" بووە، نەک فەتوایەکی ناچارکەر. ئەمەش نەریتی مەرجەعیەتی نەجەفە کە ئامۆژگارییەکانیان ناچارکەر نین، بەڵام بە جدی وەردەگیرێن.

ناردنی ئەم نامەیە دوای داواکاری هەندێک لە لایەنگرانی سیستانی هاتووە لە لوبنان، کە لە کاتی گرژییەکاندا سەردانی نەجەفیان کردووە و پرسیاریان لەبارەی ئەرکی ئایینییانەوە کردووە لە ئەگەری فراوانبوونی شەڕەکە، داوای ئامۆژگاری و فەتوایان کردووە.