عێراق لە پۆلێنبەندی نەتەوەیەکگرتووەکان بۆ مافەکانی مرۆڤ پلەیەک دادەبەزێت

ئاڤا نیوز

عێراق لە پۆلێنبەندی نەتەوەیەکگرتووەکان بۆ دۆخی مافەکانی مرۆڤ، پلەیەک دادەبەزێت، پەرلەمانتارێکیش هۆشداری دەدات لەوەی؛ تا کۆتایی ئەمساڵ، هاوپەیمانیی جیهانی بۆ دامەزراوەکانی مافی مرۆڤ، پلەبەندی عێراق نزمتر بکەنەوە.

وێنە گەورەکە: بەپێی دوایین ڕاپۆرتی ڕاسپاردەکانی کۆمیسیۆنی مافەکانی مرۆڤی سەر بە نەتەوەیەکگرتووەکان لەسەر دۆخی مافەکانی مرۆڤ لە عێراق لەنێوان ساڵانی 2021 تاوەکو 2025، کۆمیسیۆنەکە چەندین تێبینی لەسەر کەمتەرخەمی عێراق هەیە سەبارەت بە پاراستنی مافەکانی مرۆڤ، بەتایبەت لە پرسی ئافرەتان، منداڵان و ئازادیی ڕۆژنامەوانیدا.

لێدوانی فەرمی: کاروان یاروەیس، ئەندامی ئەنجوومەنی نوێنەرانی عێراق بە ئاڤای ڕایگەیاند، بەپێی پۆلێنبەندی کۆمیسیۆنی باڵای مافەکانی مرۆڤ سەر بە نەتەوە یەکگرتوەکان، عێراق لە پلەی (أ) دابەزێنراوە بۆ پلەی (ب). 

ئەو پەرلەمانتارە هۆشداریش دەدات لەوەی، لە کۆتایی ئەمساڵ، هاوپەیمانیی جیهانی بۆ دامەزراوەکانی مافی مرۆڤ کۆبوونەوەی خولیی ئاسایی خۆی دەکات و ئاماژەکان بەو ئاڕاستەیەن کە پلەبەندی عێراق لە پۆلێنەکە زیاتر داببەزێنرێت و، بە نووسراوی فەرمی، سەرۆکایەتی ئەنجوومەنی نوێنەرانی عێراقمان لەو مەترسییە، ئاگادار کردووەتەوە.

هۆکارە زانراوەکان: یەکێک لە هۆکارە سەرەکییەکانی دابەزاندنی پۆلێنی عێراق بۆ ڕەوشی مافەکانی مرۆڤ، پەیوەندی هەیە بەوەی؛ لە ساڵی 2021ەوە تەمەنی یاسایی ئەنجوومەنی کۆمیسیارانی کۆمیسیۆنی باڵای مافەکانی مرۆڤ لە عێراق کۆتایی هاتووە و، تا ئێستا بەهۆی ڕێکنەکەوتنی لایەنەکان لە دابەشکردنی پۆستەکانی دامەزراوەکە، پەرلەمانی عێراق نەیتوانیوە لەسەر پەسەندکردنی ئەنجوومەنێکی نوێی کۆمیسیاران، دەنگ بدات.

پەیوەست بەم بابەتە: تاڤگە عومەر، بەڕێوەبەری گشتیی فەرمانگەی یاسا و پاراستنی مافەکانی مرۆڤ هەرێمی کوردستان کە ئێستا کاندیدی ژمارە 9 ـی پارتی دیموکراتی کوردستانە لە بازنەی سلێمانی بۆ هەڵبژاردنی ئەنجوومەنی نوێنەرانی عێراق، لەمیانی بەشداریکردنی لە بەرنامەی گفتوگۆی هەڵبژاردنی ئاڤا، دووپاتیکردەوە، کۆمیسیۆنی مافەکانی مرۆڤی سەر بە نەتەوە یەکگرتووەکان کۆمەڵێک تێبینییان لەسەر دۆخی مافەکانی مرۆڤ لە عێراقدا هەیە بەتایبەت لە پرسی ژنان، منداڵ و ئازادیی ڕۆژنامەنووسی. دووپاتیشی دەکاتەوە، ئەزموونی سەرکەوتووی هەرێمی کوردستان لە پاراستنی مافەکانی مرۆڤ، بەهیچ جۆرێک بەراوردی عێراق ناکرێت.