ئەمریکا چاودێری جێبەجێکردنی ڕێککەوتنی غەززە دەکات

ئاڤا نیوز

نوێنەری ئەمریکا بۆ ڕۆژهەڵاتی ناوەڕاست، بۆ دڵنیابوون لەوەی ڕێککەوتنی غەززە جێبەجێ دەکرێت سەردانی ئیسرائیل و میسر دەکات.

وێنە گەورەکە: تاڕادەیەک قۆناغی یەکەمی ڕێککەوتنی غەززە سەرکەوتوو بوو، کە تێیدا 20 بارمتەی ئیسرائیلی و دوو هەزار زیندانی فەڵەستینی ئازادکران و هێزەکانی ئیسرائیلیش لە بەشێکی غەززە کشانەوە.

زانیاریی بەدەستهاتوو: پێگەی ئەکسیۆسی ئەمریکی ئاشکرایکردووە، چاوەڕوان دەکرێت شەوی یەکشەممە، ستیڤ ویتکۆف نوێنەری ئەمریکا بۆ ڕۆژهەڵاتی ناوەڕاست بچێتە ئیسرائیل و میسر بۆ دڵنیابوون لە ڕێکارەکانی جێبەجێکردنی ڕێککەوتنی غەززە.

لەلایەکی دیکەوە: حەماس لە ڕاگەیێنراوێکدا داوای لە وڵاتانی نێوەندگیر کردووە، ڕۆڵی خۆیان لە بەدواداچوون بۆ جێبەجێکردنی ئەو بڕگانەی کە لە ڕێککەوتنەکەدا ماونەتەوە بگێڕن، بەتایبەتی ئەوانەی تایبەتن بە هاوکارییە مرۆییەکان و کردنەوەی دەروازەی ڕەفەح و ئاوەدانکردنەوەی غەززە.