بەهۆی تەقینەوەیەک لە کێڵگەی نەوتی بەسرە کوژرا و بریندار هەن

ئاڤا نیوز

بەهۆی تەقینەوەیەک تۆرباینێک لە کێڵگەی "زوبێر 1"ی نەوتی لە بەسرە، بەگوێرەی ئامارە سەرەتاییەکان 11 کەس کوژران و برینداربوون.

زانیاریی بەدەستهاتوو: سەرچاوەیەکی ئەمنیی لە پارێزگای بەسرە بە ئاڤا میدیای ڕاگەیاند، تەقینەوەکەی ئەمڕۆ لە ئەنجامی پابەندنەبوون بە ڕێساکانی سەلامەتی گشتی بووە، هاوکات بەشێک لە کرێکاران لە نزیک شوێنێکی سووتێنەر خەریکی لەحیمکردن بوون،  کە ئەمەش بووە هۆی تەقینەوە و ئاگرکەوتنەوە و بەشێک لە پرۆسەی بەرهەمهێنان بەشێوەیەکی کاتی وەستاوە.

زانیاریی زیاتر: لە ئەنجامی ڕووداوەکەدا بەڕێوەبەری بەشی کۆگاکانی کێڵگەکە گیان لەدەستداوە، هاوکات ژمارەی بریندارەکانیش 10 کەسی تێپەڕاندوە، برینەکانیان جیاوازە بەشێکیان تووشی سووتان و هەندێکیش تووشی خنکاندن بوون.

ئەوەی پێویستە بیزانیت: تیمەکانی بەرگریی شارستانی توانیویانە ئاگرەکە کۆنتڕۆڵ بکەن و زیانە ماددییەکان سنووردار بکەن، هاوکات توانیویانە ڕێگری بکەن لە بڵاوبوونەوەی بڵێسەی ئاگرەکە بۆ یەکەکانی دیکەی تۆربینەکان و ئامێرە گرنگەکانی ناو کێڵگەکە.