سەفین دزەیی: هیوادارین پرۆسەی ئاشتیی بگاتە قۆناغێک تووندوتیژی کۆتایی بێت

ئاڤا نیوز

سەفین دزەیی، بەرپرسی فەرماندەی پەیوەندییەكانی دەرەوەی حكومەتی هەرێمی كوردستان لە پەراوێزی بەشداریكردنی لە ڕێوڕەسمی ساڵیادی  102ی دامەزراندنی كۆماری توركیا ڕایگەیاند، پەیوەندییەکانی هەرێمی کوردستان لەگەڵ وڵاتانی دەوروبەر بە تایبەتی تورکیا و ئێران و سووریا و خودی عێراق، جێگای بایەخ و گرنگی حکومەتی هەرێمی کوردستانە سەبارەت بە پرۆسەی ئاشتیش گوتی، هیوادارین پڕۆسەی ئاشتی بگاتە قۆناغێک کە تووندوتیژی و شەڕ و پێكدادان كۆتایی بێت.

 
چیرۆکی سەرەکی: كونسوڵخانەی توركیا لە هەولێر، ڕێوڕەسمێكی بۆ 102 ساڵەی دامەزراندنی كۆماری توركیا ساز كرد و لەومیانەیەدا ژمارەیەک لە بەرپرسانی حكومی و حیزبی ئامادەیی بوون.

لێدوانی فەرمی: سەفین دزەیی، سەرۆکی فەرمانگەی پەیوەندییەکانی دەرەوەی هەرێمی کوردستان، بە ئاڤا میدیای ڕاگەیاند، پەیوەندییەکانی هەرێمی کوردستان لەگەڵ وڵاتانی دەوروبەر بە تایبەتی تورکیا و ئێران و سووریا و خودی عێراق، جیگای بایەخ و گرنگی حکومەتی هەرێمی کوردستانە، هاوكات هەرێمی كوردستان لەڕووی ئابووری و ئاسایش و پێگە جوگرافییەكەیشی بۆ ئەوان گرنگە.

زانیاریی زیاتر: سەفین دزەیی، گوتیشی: هیوادارین پڕۆسەی ئاشتی بگاتە قۆناغێک کە تووندوتیژی و شەڕ و پێکدادان نەمێنێت، گەلانی ناوچەکە هەموو بە ئاشتی و برایەتیی و تەبایی بژین و خۆشگوزەرانی بۆ هەموو تاکێک لەسەر بنەمای مرۆڤ دابین بکرێت، هەبوونی هاووڵاتییانی کورد لە دەوروبەر و وڵاتانی دەرەوە وادەكات کە ئێمە پەرۆشی ئەمنیی و ئاسایشی ئەوانیش بین، پەرۆشی ئەوەیەن کە هەموو هاووڵاتییانمان بە ئازادی و بە خۆشییەوە بژین.

ئەوەی پێویستە بیزانیت: زیاتر لە 41 کۆنسوڵخانە و نوێنەرایەتیی وڵاتان لەهەرێمی کوردستان هەن، حکومەتی هەرێمی کوردستانیش 14 نوێنەرایەتیی لە دەرەوە هەیە،  ئەرکی سەرەکی فەرمانگەی پەیوەندییەکانی دەرەوە، پتەوکردنی پەیوەندییەکانی هەرێمی کوردستانە لەگەڵ کۆمەڵگەی نێودەوڵەتیی.