سەرۆک بارزانی: جگە لە خودا تەنها بۆ دایکی شەهیدان خۆمان دەچەمێنین

ئاڤا نیوز

 

سەرۆک بارزانی لە کۆبوونەوەکدا لە دهۆک ستایشی ڕۆڵی دایکان و خانەوادەی شەهیدانی لە شۆڕشەکانی کورد کرد و ڕایگەیاند، "جگە لە خودا ئێمە بۆ کەس خۆناچەمێنین." گوتیشی، تەنها "بۆ دایكی شەهیدان و خانەوادەی شەهیدان 10 جار خۆمان دەچەمێنین".

 

چیرۆکی سەرەکی: ئەمڕۆ پێنجشەممە 30-10-2025، سەرۆك بارزانی لە شاری دهۆك لەگەڵ ژمارەیەكی زۆری دایكان و خانەوادەی شەهید و پێشمەرگە و ئافرەتە تێكۆشەرەكانی پارێزگای دهۆك کۆبووەوە.

 

ڕاگەیێنراوی فەرمی: بەگوێرەی ڕاگەیێنراوی بارەگای بارزانی، سەرۆک بارزانی ئاماژەی بە ڕۆڵ و کاریگەریی ئافرەتان لە شۆڕشەكان کرد و ڕایگەیاند، لە شۆڕشی ئەیلوولەوە تا ئەمرۆ ئافرەت "باوك، دایك، مامۆستا و جووتیار بووە"، بۆیە ئەو خەبات و قوربانیدانەی گەلی کورد و ڕۆڵ و ئازایەتیی ئافرەتانی کورد "ئەمانەتێكی گەورەیە لەسەر شانی ئێمە، هەرچی بیڵێم بەرامبەر بە دایكی شەهیدان و کەسوکاری شەهیدان هێشتا هەر کەمە".

 

لە بەشێکی دیکەی وتارەکەیدا سەرۆک بارزانی ستایشی دایکی شەهیدانی کرد و گوتی، "جگە لە خودا ئێمە بۆ کەس خۆناچەمێنین، تەنها بۆ دایكی شەهیدانی خانەوادەی شەهیدان 10 جار خۆمان دەچەمێنین".

 

لەلایەکی دیکە؛ سەرۆک بارزانی ئاماژەی بە چاكسازییەكانی سەردەمی شێخ عەبدولسەلام بارزانی دا سەبارەت بە مافی ئافرەتان و ئەوەی خستە ڕوو، کە ڕەنگە هێشتا وەك پێویست مافی ئافرەتان دەستەبەر نەکرابێت، بەڵام "ئافرەت خۆشی خەباتی بێوچان بکات و دڵنیا بن بە هەموو شێوەیەك لە پشت ئێوە دەبم".

 

سەرۆک بارزانی تیشکی خستە سەر پیلانەکانی ئێستا بۆ سەر هەرێمی کوردستان و وتی، "ئێستا دوژمن بە شێوەیەکی بەرنامە بۆداڕێژراو دەیانەوێت گەنجانمان تووشی ماددەی هۆشبەر بکەن. لەهەمان کاتدا دەیانەوێت خەڵك بێ ئومێد بکەن، بۆئەوەی هیچ سۆز و خۆشەویستییەکیان بۆ نیشتمان نەمێنێت، بۆیە ئەرکی گەورە لەسەر شانی هەر ئافرەتێكە  کە منداڵەکەی لە ماڵەوەدا لەو مەترسییانە ئاگادار بکاتەوە".

 

گۆشەیەکی دیکەی دیمەنەکە: سەرۆک بارزانی بەشێکی دیکەی وتارەکەی تەرخان کرد بۆ باسکردن لەسەر بڕینی مووچەی کوردستان و ڕایگەیاند، "بەغدا مووچەی خەڵکی کوردستانی وەك کارتێكی سیاسی بەکارهێنا،  ئەمەش بە چاوساغی خەڵكێكی ناوخۆیی کە ڕێگەیان بۆ بەغدا خۆش کرد، ئەوەش لە ئەنفال و کیمیاباران کەمتر نەبوو".

 

سەرۆك بارزانی جەختی لە پەروەردەکردنی ڕۆڵەکانی ئێستا و داهاتوو کردەوە کە "خۆیان بە کەمتر نەبینن لە تاکی هەر کۆمەڵگەیەكی دیکە" و دەبێت نەوەکان بەوشێوەیە پەروەردە بکرێن کە لە ئاستێكی بەرزی وریاییدا بن.

 

ئەمەش بزانە؛ لە کۆتاییدا، سەرۆك بارزانی باسی لە مێژووی دامەزراندنی پارتی کرد و دووپاتی کردەوە، پارتی لە کاتێکدا دامەزرا کە کورد تووشی نائومێدی بووبوو، بەڵام بە دامەزراندنی پارتی ئومێد بۆ خەڵكی کوردستان گەڕایەوە، چونکە پارتی "بەرپرسیاریێتیی مەزنی لە ئەستۆیە و لە بەرپرسیاریێتی ڕاناکات".