بارینی بەفر لە قەرس كاریگەریی لەسەر ژیانی هاووڵاتیان دروستكردووە

ئاڤا نیوز

شەپۆلێكی سەختی سەرما و زوقم پارێزگای قەرسی لە باكووری كوردستان گرتووەتەوە، و کاریگەریی نەرێنی لەسەر ژیانی هاووڵاتییان دروست کردووە.

چیرۆكی سەرەكی: بەهۆی بارینی بەفر لە بەرزاییەکانی شاری قەرس، گوندەکانی ناوچەکە بەرگی سپیان پۆشی و، ئەمەش لەپاڵ ئەوەی دیمەنێکی جوان و قەشەنگی بە گوندی بۆرلوک بەخشیوە، هاوكات كاریگەری سەرماكە بەجۆرێكە كە لە ناوەندی شارەكە، ئۆتۆمبێل و گژو گیا و نەمامەكان، شەختە و زوقمیان گرتووە و لە بەشێكی پارێزگاكەش، جامی ئۆتۆبێلەكان بەستوویەتی.

بینراو و بیستراو: بەپێی ئاژانسی هەواڵی ئەنادۆڵ، لە قەزای ساریکام سەر بە پارێزگای قەرس، پلەی گەرما لەكاتی شەودا، بۆ خوار شەش پلەی ژێر سفری سەدی دابەزی، بەهۆیەوە جامی ئۆتۆمبێلەکان بەستوویەتی و ڕووەکەکان زوقمیان گرتووە. ژمارەیەک هاووڵاتیش بۆ پاراستنی ئۆتۆمبێلەکانیان لە بەستن، بە بەتانی و فەرش دایانپۆشیوە.

زانیاریی زیاتر: ناوچەی ئاجیسو کە پێنج کیلۆمەتر لە قەزای ساریكامەوە دوورە، ئاوی ڕووبارە بچووکەکان بەستوویەتی و، چیاکانی سوپهان و کۆسە ڕەنگی سپیان پۆشی.