مەسرور بارزانی بەردی بناغەی پرۆژەی "ڕێڕەوی ژیان" لە هەولێر دادەنێت

ئاڤا نیوز

 

ئەمڕۆ چوارشەممە 5-11-2025، سەرۆکوەزیران مەسرور بارزانی بەردی بناغەی پڕۆژەی "ڕێڕەوی ژیان"ـی لە هەولێر دانا.

 

بۆچی گرنە؛ پرۆژە گەورەکە شوێنی کۆبوونەوەی ئاو و ئاوەڕۆی چەند گەڕەکێک، بۆ ناوچەیەکی جوان و گەشتیاریی و سەرنجڕاکێش لە هەولێر دەگۆڕێت.

 

ژمارەکان وادەڵێن: ئاوی پرۆژەکە لە سێ دەریاچە پێکهاتووە و بە دوو ڕێڕەو دابەش دەكرێت و بەشێوەی بازنەیی بە چواردەوری هەولێردا دەسوورێتەوە، کۆی ڕووبەری تەرخانکراو 101,600 مەتر دووجایە، هاوکات پانی ڕێڕەوی پرۆژەکە لەنێوان 15 بۆ 25 مەترە، هەرچی قووڵییەکەیەتی؛ پێنج مەترە. 

 
زانیاریی زیاتر: پرۆژەی ڕێڕەوی ژیان لەلایەن ئەندازیارایانی ناوخۆیی و ڕاوێژکارانی ئیتاڵییەوە دیزایین کراوە، لە گەڕەکی شاوەیس و سێبەردان دەستپێدەکات تا دەگاتە ڕێگای سەرەکیی کەرکووک و دواتر ڕێگای مەخموور. 

 

ئەمەش بزانە: شوێنی پرۆژەکە هەندێکجار دەبوو به‌ شوێنی فڕێدانی زبڵ و پاشماوە و کۆبوونەوەی ئاوەڕۆ، لە وەرزی هاوین وشک و لە زستانیشدا وەک زەلکاوێکی لێ دەهات، ئێستا دەکرێتە پرۆژەیەکی جوان و دەگۆڕدرێت بە "ڕێڕەوی ژیان"، ئەمە جگە لە چاندنی دار و سەوزایی، کردنەوەی چێشتخانە و کافێ لە شوێنەکە.