لە کەرکووک هەزار پارچە زەوی بە سەر خانەوادەی شەهیدان دابەش دەکرێت

ئاڤا نیوز

پارتی لە کەرکووک هەزار پارچە زەوی بەسەر كەسوكاری شەهیدانی ڕووبەڕووبوونەوەی تیرۆریستانی داعش و شەهیدانی ئاڵا و 2ـی ئەیلوول دابەش دەکات.

چیرۆکی سەرەکی: ئەمڕۆ چوار شەممە، لە مەراسیمێکدا لە مەکتەبی ڕێکخستنی کەرکوک - گەرمیانی پارتی دیموكراتی كوردستان، بڕیاری پێدانی هەزار پارچە زەوی بەکەسوکاری شەهیدانی 2ـی ئەیلوول، ڕووبەڕووبوونەوەی تیرۆریستانی داعش و شەهیدانی ئاڵا راگەیێنرا.

لێدوانی فەرمی: د. شاخەوان عەبدوڵڵا، ئەندامی کۆمیتەی ناوەندی پارتی و سەرۆکی لیستی 275ـی پارتی لە کەرکووک، بە ئاڤای ڕاگەیاند: پڕۆسەی دابەشکردنی هەزار پارچە زەوی لە کەرکووک، کارەکانی تەواو کراوە و لە دوای هەڵبژاردن دەست بە دابەشکردنیان دەکرێت.

گوتیشی، هەمیشە خۆمان بەشەرمەزار دەزانین لەبەرامبەر کەسوکاری سەربەرزی شەهیدان، پارتی بەوەفایە بەرامبەر کەسوکاری شەهیدان و ئەمە وەفایەکی بچوکە بەرامبەریان.

زانیاریی زیاتر: نەخشەی کەرتی زەوییەکان لە سێکانییان کراوە و سەرەبلۆک و کۆڵانەکانی دیارکراوە و خزمەتگوزاری بۆ چووە، بەشێوەی تیروپشک دوای هەڵبژاردن دابەش دەکرێن، پرۆسەکە لەلایەن بەشی کارگێڕی و دارایی مەکتەبی سیاسی سەرپەرشتی دەکرێت .