ئاڤای خەڵک؛ دانیشتووانی بەستەپیازەی هەولێر داوای چاککردنی کۆڵانەکانیان دەکەن

ئاڤا نیوز

بەهۆی خراپی و چاڵ و چۆڵی سێ کۆڵان لە گەڕەکی بەستەپیازەی هەولێر، دانیشتوانی گەڕەکەکە تووشی ناڕەحەتی بوون و داوای چارەسەر دەکەن.

زانیاریی بەدەستهاتوو: بەفرین مارمار دانیشتوویەکی گەڕەکەکەیە بە ئاڤای وت، لەساڵی 1989ـەوە ئەو کۆڵانانە کۆنکرێت کراون، لەو کاتەوە تا ئێستا هەمووی بۆتە چاڵ چۆڵ و زستان گەڕەکەکە ژێر ئاو دەکەوێت و بۆنی ناخۆش ژیانی لێ تاڵ کردووین.

ئەرسەلان مەحەممدئەمین دانیشتوویەکی دیکەی ئەو گەڕەکەیە بە ئاڤای وت، چەندینجار چووینەتە لای پارێزگار و شارەوانی، چوار ساڵە هەر ئەمڕۆ و سبەیمان پێ دەکەن، ئۆتۆمبێلەکانمان هەمووی وێران بوون، بەهۆی خراپی کۆڵانەکانیش سەوزە فرۆش و ماستفرۆشیش بەو گەڕەکەدا نایەن.

لێدوانی فەرمی: ئومێد خۆشناو پارێزگاری هەولێر بە ئاڤای وت، دەرخستەی بۆکراوە و 220 ملیۆن دیناریشی بۆ تەرخان کراوە، بەڵام بەهۆی گرفتی دارایی نەچووەتە بواری جێبەجێکردن، بەڵام هەموو هەوڵێک دەدەین بەمنزیکانە ئەو کۆڵانانە نۆژەن بکەینەوە بەتایبەت ئەوە گەڕەکی منداڵیمە و خۆم هەر لەوێ گەورە بووم.