هەموو ئەو زانیارییانەی کە پێویستە لەبارەی دەنگدانی تایبەتەوە بیزانیت

ئاڤا نیوز

ئاڤا میدیا زانیاریی ورد لە بارەی بەڕێوەچوونی دەنگدانی تایبەت لە هەرێمی کوردستان و عێراق بڵاودەکاتەوە.

چیرۆکی سەرەکی: سبەی دەنگدانی تایبەت لە سەرتاسەری هەرێمی کوردستان و عێراق بە بەشداری یەک ملیۆن و 313 هەزار و 980 کارمەندی هێزە ئەمنییەکان بەڕێوەدەچیت، کە 809 بنکەی دەنگدان و چوار هەزار و 501 وێستگەی دەنگدان لە خۆدەگرێت. 

لێدوانی فەرمی: نەبەرد عومەر، سەرۆكی دەستەی هەڵبژاردنەكانی هەرێمی كوردستان لە كۆمیسیۆن بە ئاڤای ڕاگەیاند: هەزار و 312 بنکەی دەنگدانی گشتی و 204 بنکەی دەنگدانی تایبەت بۆ بەڕێوەچوونی هەڵبژاردنی پەرلەمانی عێراق ئامادە کراون.

زانیاریی زیاتر: لە هەرێمی کوردستان پێنج هەزار و 599 وێستگەی دەنگدان هەیە، بەمشێوەیە بەسەر پارێزگاکاندا دابەش بوون: 

هەولێر: دوو هەزار و 23 وێستگەی دەنگدان، بەسەر 528 بنكەی دەنگدان دابەش بوون.  

سلێمانی: دوو هەزار و 200 وێستگەی دەنگدان هەیە، بەسەر 506 بنكە دابەش بوون.

دهۆك: هەزار و 396 وێستگەی دەنگدان هەیە، بەسەر 278 بنكە دابەش بوون.

ئەوەی پێویستە بیزانیت: سبەی دەنگدانی تایبەت لە 204 بنکەی دەنگدان بەڕێوەدەچیت کە 958 وێستگەیان لەخۆگرتووە.

هەولێر: 79 بنکە کە دەکاتە 385 وێستگە.

سلێمانی: 82 بنکە کە دەکاتە 378 وێستگە.

دهۆک: 43 بنکە کە دەکاتە 195 وێستگە.

ئەمەش بزانە: لە ڕۆژی بەڕێوەچوونی دەنگدانی تایبەتدا، ئاوارەکانیش دەنگ دەدەن، لە شاری دهۆك ژمارەیان 25 هەزار و 986 دەنگدەرە كە دابەش بوونە بەسەر 23 بنكەی دەنگدان، لە هەولێریش 547 كەس كە ئاوارەی ناوەڕاست و باشووری عێراقن دەنگ دەدەن.