مووچەی پێشمەرگەی یەکەکانی 70 و 80 زیاد دەکرێت

ئاڤا نیوز

 

مووچەی پێشمەرگەی یەکەکانی 70 و 80 زیاد دەکرێت و دەرماڵەی خێزان و منداڵیان بۆ دەبەسترێت. ئاڤا زانیویەتی بەستنی دەرماڵەکان بۆیان دەکەوێتە دوای پەسەندکردنی بودجەی ساڵی 2026.

 

وێنە گەورەکە؛ ئێستا یەکەی 80 نەماوە و خراوەتە سەر وەزارەتی پێشمەرگە و بووەتە فەرماندەیی دەڤەری یەک. پرۆسەی گواستنەوەی یەکەی 70 بەردەوامە و لە مانگەکانی داهاتوودا ئەویش نامێنێت و دەبێتە فەرماندەیی دەڤەری دوو. ئەمە لە چوارچێوەی یەکخستنەوەی هێزەکانی پێشمەرگەیە بەسەرپەرشتی ئەمریکا و هاوپەیمانان. ئەم پرۆسەیە چەندین سوودی هەیە، یەکێکیان زیادکردنی مووچە و ئیمتیازاتی پێشمەرگەیە.

 

بەدواداچوونی ئاڤا؛ بەپێی بەدواداچوونەکانی ئاڤا بۆ قۆناغی ئێستا دەرماڵەکانیان بۆ نابەسترێت و کەمێک دوادەکەوێت. سەرچاوەیەک لە وەزارەتی پێشمەرگە بە ئاڤای ڕاگەیاند، بەستنی دەرماڵەکان بۆیان دەکەوێتە دوای پەسەندکردنی بودجەی ساڵی 2026، ئەوکات هەر دەرماڵەیەک بە پێشمەرگەی سەر بە وەزارەت بدرێت ئەوانیش دەگرێتەوە.

 

پێشمەرگەکانی سەر بە وەزارەتی پێشمەرگە دەرمامەڵەی خێزانیان هەیە 70 هەزارە، لەگەڵ دەرماڵەی منداڵ کە بۆ هەر منداڵێک 15 هەزار دینارە. واتە ئەگەر پێشمەرگەیەک دوو منداڵی هەبێت ئەوا مانگانە 100 هەزار دینار دەچێتە سەر مووچەکەی. ئەو دوو دەرماڵەیە بۆ سەرجەم پێشمەرگەکانی هەردوو فەرماندەیی دەڤەری یەک و دووش دەبەسترێت.

ئەمەش بزانە: بەپێی یاسا دەرماڵەی خێزان 70 هەزار دینارە، هەر منداڵێکیش 15 هەزار، واتە ئەگەر پێشمەرگەیەک دوو منداڵی هەبێت ئەوا مانگانە 100 هەزار دینار دەچێتە سەر مووچەکەی.