سەرۆکكۆماری عێراق لەگەڵ سەرۆک بارزانی كۆدەبێتەوە

ئاڤا نیوز

عەبدولـلەتیف ڕەشید، سەرۆککۆماری عێراق سەردانی هەولێر دەکات و لەگەڵ سەرۆک بارزانی و سەرۆکی هەرێمی کوردستان و سەرۆکوەزیران بارزانی کۆدەبێتەوە.

وێنە گەورەکە: ئێوارەی ئەمڕۆ سەرۆککۆماری عێراق بۆ بەشداریکردن لە کۆنفڕانسێکی ژینگەیی دێتە هەولێر، لە چوارچێوەی ئەو سەردانە لەگەڵ بەرپرسانی باڵای هەرێمی کوردستان کۆدەبێتەوە.

لێدوانی فەرمی: "سەرۆککۆماری عێراق بە جیا لەگەڵ سەرۆک بارزانی، سەرۆکی هەرێمی کوردستان، سەرۆکوەزیران بارزانی و جێگری سەرۆکوەزیران کۆدەبێتەوە و گفتوگۆ لەسەر دوایین بارودۆخی هەرێمی کوردستان، عێراق و ناوچەکە دەکەن." هاوڕێ تۆفیق، بەڕێوەبەری گشتیی پەیوەندییەکان و ڕێکخراوە نێودەوڵەتییەکان لە سەرۆکایەتیی کۆماری عێراق وای بە ئاڤا نیوز گوت.

ئەوەی پێویستە بیزانیت: سبەی سەرۆککۆماری عێراق لە کۆنفڕانسی وشکەساڵی و کاریگەریی گۆڕانی کەشوهەوا لەسەر سیاسەت، ئابووری و دیمۆگرافیای عێراق گوتارێک پێشکەش دەکات.