یەکەم کاروانی بریندارانی غەززە گەیشتە عێراق

ئاڤا نیوز

 

دوای مانگێک لە ئامادەیی دەربڕین بۆ وەرگرتنی بریندارەکانی غەززە، یەکەم کاروانی بریندارەکان لە فڕۆکەخانەی نێودەوڵەتیی بەغدا پێشوازیان لێکرا.

 

بۆچی گرنگە؟ لەوەتەی شەڕی نێوان هێزەکانی ئیسرائیل و چەکدارانی حەماس لە فەلەستین دەستی پێکردووە، بەهۆی هێرشەکانی ئیسرائیلەوە بۆ سەر کەرتی غەززە، تاوەکو ئێستا زیاتر لە 35 هەزار کەس کوژران و نزیکەی 80 هەزار کەسی دیکەش بریندار بوونە.

 

لێدوانی فەرمی: هانی عەقابی، بریکاری وەزارەتی تەندروستیی عێراق ڕایگەیاند: لەسەر ڕاسپاردەی سەرۆکوەزیران و بە سەرپەرشتیی وەزیری تەندروستی ئەمڕۆ پێشوازیمان لە 27 برینداری غەززە کرد، ئەوانەی بەدەست چەند نەخۆشییەکی چارەسەرنەکراوەوە دەناڵێنن، لەگەڵ 42 کەس لە هاوەڵەکانیان".

 

زانیاریی زیاتر: وەزارەتی تەندروستی هەموو پێداویستییەکانی ئامادە کردووە، لەوانە: گواستنەوە، وەرگرتن و دابینکردنی سەرجەم کارمەندانی پزیشکی، سەرجەم بریندارەکانیش لە شاری پزیشکی لە بەغدا چارەسەر دەکرێن.

 

ئەمەش بزانە: مانگێک پێش ئێستا ساڵح حەسناوی، وەزیری تەندروستیی عێراق ئامادەیی تەواوی وڵاتەکەی بۆ پێشوازیکردن لە بریندارانی فەلەستینی لە دامودەزگاکانی حکومەت یان نەخۆشخانە تایبەتەکان ڕاگەیاندبوو.