سەرۆکایەتیی کۆماری عێراق وەڵامی ئێزدییەکان لەبارەی دانانی میر دەداتەوە

ئاڤا نیوز

 

سەرۆکایەتیی کۆماری عێراق، وەڵامی نامەیەکی ئێزدییەکان لەبارەی دانانی میر دەداتەوە و ڕایدەگەیێنێت، دانانی سەرۆک و سەرکردەی مەزهەبە ئایینییەکان لە دەسەڵاتی ئەواندا نییە.

 

وێنە گەورەکە: ساڵی 2019 دوای مردنی تەحسین بەگ، میری کوردانی ئێزدی لە عێراق و جیهان، ماڵی ئێزیدییەکان میر حازم تەحسین بەگیان وەک میری نوێی ئێزیدییەکان لە عێراق و جیهان دەستنیشان کرد. 

 

بۆچی گرنگە: پێش مانگێک لە شاری بەغدا، سالم نەجمان بەگ کە لە بنەماڵەی میرانی کوردانی ئێزدییە، وەکو میر ناسێنرا و ڕێوڕەسمێکی بۆ سازکرا؛ ناساندنی ئەو کەسەش وەک میر لە بەغداوە، کاردانەوەی ئێزدییەکانی بەدوای خۆیدا ھێنا و لەوبارەیەوە نامەیەکیان ئاراستەی سەرۆکایەتیی کۆمار کرد.

 

ڕاگەیێنراوی فەرمی: سەرۆکایەتیی کۆماری عێراق لە وەڵامی نامەکەدا ڕایگەیاند: "ڕێکارەکانی دانان و دەستبەکاربوونی حازم تەحسین بەگ وەک میر بۆ ئایینیی ئێزدی لە عێراق و جیهان، بەپێی دەستوور و یاسا لە دەسەڵاتی ئێمەدا نییە".

 

ئەمەش بزانە: دوای دانانی میرێک لە بەغداوە بۆ ئێزدییەکان، لە سەلاحەددین سەرۆک بارزانی پێشوازیی لە حازم تەحسین بەگ، میری کوردانی ئێزدی و ئەنجوومەنی ڕۆحانیی ئێزدی کرد و ڕایگەیاند: "بە هەموو توانای خۆی پاڵپشتی خوشک و برایانی ئێزدی دەکات و ڕێگە نادات بابەتی نامۆ بەسەر ئێزدییەکاندا بسەپێندرێت".