سەدان ملیۆن کەس لەسەر ئاستی جیهان ڕووبەڕووی برسیێتی بوونەتەوە

ئاڤا نیوز 

نەتەوەیەکگرتووەکان لەبارەی بەرزبوونەوەی ڕێژەی برسێتی لە جیهان هۆشداری دەدات و ڕایدەگەیێنێ، لە 2023 دا 733 ملیۆن کەس ڕووبەڕووی برسێتی بوونەتەوە، زیاتر لە 864 ملیۆن کەسیش هەندێکجار بۆ ماوەی یەک ڕۆژ هیچ خۆراکێکیان دەست ناکەوێت.

چیرۆکی سەرەکی: هەریەک لە ڕێکخراوەکانی خۆراک و کشتوکاڵ  (FAO)، بەرنامەی خۆراکی جیهانی  (WFP)، بەرنامەی نێودەوڵەتیی گەشەپێدانی کشتوکاڵی  (IFAD)، سندووقی یارمەتی منداڵانی سەر بە نەتەوەیەکگرتووەکان (UNICEF) و ڕێکخراوی تەندروستیی جیهانی (WHO)، ڕاپۆرتێکیان لەبارەی بەرەنگاربوونەوەی برسیێتی و هەژاری پێشکەش کردووە. لە ڕاپۆرتەکەدا کە لە ڕۆژی 24ی تەممووز بڵاوکرایەوە، هۆشداری لە بەرزبوونەوەی ڕێژەی برسێتی لە جیهان دەدەن.

ڕاگەیێنراوی فەرمی: لە ساڵی ڕابردوودا لە نێوان 713 بۆ 757 ملیۆن کەس تووشی بەدخۆراکی ببوون و 733 ملیۆن کەسیش ڕووبەڕووی برسێتی ببوونەوە، واتە لە ئاستی جیهاندا لە هەر 11 کەس یەک کەس تووشی برسێتی دەبێت، بە بەراورد بە ساڵی 2019 ەش دوو ملیۆن کەس زیادی کردووە.

زانیاری زیاتر: نەتەوەیەکگرتووەکان جەختی لەوە کردووەتەوە، لە ساڵی 2022 تا ساڵی 2023، ئاستی برسێتی لە ناوچەکانی ڕۆژهەڵاتی ئاسیا بە ڕێژەی 8.1٪، هەروەها لە ئەفریقا بە ڕێژەی 20.4٪ و لە وڵاتانی ناوچەی کارائیبیش زیاد بووە.

ئەوەی پێویستە بزانیت: لە ڕاپۆرتەکەدا ئاماژە بەوەش دراوە، لە ساڵی 2023دا دوو ملیار و 33 ملیۆن کەس ئاسایشی خۆراکیان کەوتووەتە مەترسییەوە، لەم ژمارەیەش زیاتر لە 864 ملیۆن کەس زۆرجار بۆ ماوەی یەک ڕوژ یان زیاتر هیچ خۆراکێکیان دەستناکەوێت بیخۆن.