پرۆسەی دابەشکردنی زەوی بەسەر فەرمانبەران خێراتر دەکرێت

ئاڤا نیوز

هه‌نگاوی كرده‌یی بۆ ئاماده‌كردنی پارچه‌ زه‌وی بۆ فەرمانبەران له‌ سنووری شاره‌وانییه‌كان نراوە، بۆ خێراترکردنی پرۆسەکەش ساسان عەونی، وەزیری شارەوانی و گەشتوگوزار لەگەڵ نوێنەری بەڕێوەبەرایەتیی گشتیی شارەوانییەکان کۆدەبێتەوە.

وێنە گەورەکە:  لە شار و شارۆچکەکانی هەرێمی کوردستان بەشێکی زۆری پارچە زەوی پێویست بۆ دابەشکردن بەسەر فەرمانبەران دەستنیشان کراون، نزیکەی 30 ڕۆژیشە پڕۆسەی ڕووپێویکردنی پارچە زەوییەکان دەستیپێکردووە.

لێدوانی فەرمی: سەربەست مەولوود، بەڕێوەبەری گشتیی کاروباری یاسایی لە وەزارەتی شارەوانی بە ئاڤا نیوزی گوت: "سبەی یەکشەممە وەزیری شارەوانی لەگەڵ نوێنەری بەڕێوەبەرایەتیی شارەوانییەکانی هەرێمی کوردستان کۆدەبێتەوە، بەمەبەستی زانینی دوایین ڕێکارەکانی ئامادەکردنی زەوی لە سنوورەکانیان و خێراترکردنی کارەکانیان."