پووتین بۆ خامنەیی: پلانی هێرشێکی سنووردار بۆ سەر ئیسرائیل ئامادە بکە

ئاڤا نیوز

 

ئاژانسی ڕۆیتەرز لە زاری سەرچاوە ئێرانییەکانەوە بڵاویکردوەتەوە، ڤلادیمێر پوتین، سەرۆکی ڕووسیا داوای لە عەلی خامنەیی، ڕێبەری کۆماری ئیسلامی ئێران کردووە، پلانی "هێرشێکی سنووردار" بۆ ئیسرائیل ئامادەبکات.

 

وێنە گەورەکە: ئێران جیهانی لە چاوەڕوانی تۆڵەسەندنەوە لە ئیسرائیل هێشتووەتەوە، بەڵام هێشتا هیچ هێرشێکی نەکردووە. پشتیوانی ڕووسیا بۆ ئێران هۆکارێکە بۆ ئەوەی بتوانێت زەبرێکی قورستر لە  تەلئەڤیڤ بدات، بەڵام وا دیارە پووتین ئەمە بێبەرامبەر ناکات.

 

زانیاریی بەدەستهاتوو: پووتین داوای لە خامنەیی کردووە، لە وەڵامدانەوەی ئیسرائیلدا، خەڵکی مەدەنی نەکاتە ئامانج. لەلایەکی دیکەوە"تاران فشار دەخاتە سەر مۆسکۆ بۆ ڕادەستکردنی فڕۆکە جەنگییەکانی جۆری سو-35".

گۆشەیەکی دیکەی ڕووداوەکە: ئەنتۆنی بلینکن، وەزیری دەرەوەی ئەمریکا ڕۆژی یەکشەممە هاوتاکانی لە گرووپی 'جی حەوت' ئاگادارکردەوە, ئێران و حیزبوڵڵا ڕەنگە لە ماوەی 24 بۆ 48 کاتژمێری داهاتوو هێرش بکەنە سەر ئیسرائیل.

 

چی روویدا؟ دوای کوژرانی ئیسماعیل هەنیە، بەرپرسی مەکتەبی سیاسی بزووتنەوەی حەماس لە تاران، گرژی و ئاڵۆزییەکان لە ناوچەکەدا زیادیان کرد، پێشتریش هێرشێکی ئیسرائیل بۆ سەر بەیروت بووە هۆی کوژرانی فوئاد شوکر، کە فەرماندەیەکی سەربازیی دیاری حیزبوڵڵا بوو .