خێزانی ئەبوبەکر بەغدادی لە بەغدا زیندانی دەکرێن

ئاڤا نیوز

خێزانی ئەبوبەکر بەغدادی، خەلیفەی کوژراوی داعش دەگەڕێنرێنەوە عێراق و دەستگیر دەکرێن. دادگەی کەرخ لە بەغدا دەڵێت لێکۆڵینەوەیان لەگەڵدا دەکەن.

وێنە گەورەکە: لە چوارچێوەی بەرنامەی وەرگرتنەوەی ئەو کەسانەی تۆمەتبارن بە دۆسیەی تیرۆر و بۆ دەرەوەی عێراق هەڵاتوون، خێزانیی ئەبوبەکر بەغدادی گەڕێنراونەتەوە بەغدا.

ڕاگەیێنراوی فەرمی: دادگەی کەرخ ڕیدەگەیێنێ "خێزانیی ئەبوبەکر بەغدادی دەستگیرکراون و گوتەیان لێوەرگیراوە. بۆ ئاشکراکردنی گرنگترین نهێنییەکانی ڕێکخراوی داعش لێکۆڵینەوەیان لەگەڵ دەکرێت". 

ئەوەی پێویستە بیزانیت: دادگای کەرخ ئاماژەی بە ئەندامانی خێزانەکەی بەغدادی نەداوە و هیچ زانیارییەکی نەخستووەتەڕوو، بۆیە نازانرێت چەند ئەندامی خێزانی بەغدادی گەڕێنراونەتەوە. بەڵام ڕۆژی 6-11-2019 رەجەب تەیب ئەردۆغان، سەرۆککۆماری تورکیا دەستگیرکردنی هاوژین و خوشکێکی ئەبوبەکر بەغدادی لە سووریا ڕاگەیاند.

باکگراوند: ڕۆژی 26-10-2019، ئەبوبەکر بەغدادی لە ئۆپەراسیۆنێکی تایبەتی هێزەکانی ئەمریکا لە پارێزگای ئیدلب لە باکووری ڕۆژئاوای سووریا کوژرا.

بەغدادی هاوسەرگیری لەگەڵ چوار خانمدا کردووە، دوو لەوان دەستگیرکراون و  11 منداڵی لەدوای خۆی جێهێشتوون، ژمارەیەک لە منداڵەکانیشی گیراون.

ئەمەش بزانە: ڕەسمیە عەواد تەمەن 65 ساڵ لە گوندی ئیعزاز لە سنووری پارێزگای حەلەب لەلایەن تورکیاوە دەستگیرکرا. سەجی دلێمی بەڕەگەز عێراقی لە 02-12-2014، لەسەر سنووری سووریا و لوبنان دەسگیرکرا.