ترەمپ: ئەگەر ببمەوە سەرۆک مەسک دەکەمە بەرپرسی کۆمیسیۆنی لێهاتوویی

ئاڤا نیوز

 

دۆناڵد ترەمپ، بەربژێری کۆمارییەکان بۆ پۆستی سەرۆکایەتیی ئەمریکا ڕایگەیاند، ئەگەر ببێتەوە بە سەرۆک پۆستێکی گرنگی کابینەکەی دەداتە ئیلۆن مەسک، ملیاردێری ئەمریکی و خاوەنی تۆڕی کۆمەڵایەتیی ئێکس.

 

وێنە گەورەکە: ترەمپ ڕایگەیاندووە، نیازی هەیە دامەزراوەیەک بە ناوی کۆمیسیۆنی شایستەیی لە ناو حکومەتی ئەمریکادا بکاتەوە. ترەمپ دەشڵێت، لە ئەگەری بردنەوەی هەڵبژاردنەکان و گەڕانەوەی بۆ کۆشکی سپی، ئیلۆن مەسک دەکاتە بەرپرسی ئەو کۆمیسیۆنە.

 

زانیاریی زیاتر: کاری کۆمیسیۆنەکە ڕووبەڕووبوونەوەی ساختەکاری و بەرتیل دەبێت لە ناو دامەزراوە فیدراڵییەکانی ئەمریکا و دەبێتە بەشێکی گرنگ لە پلانی ئابووریی ترەمپ بۆ ئەمریکا. 

 

ئەوەی پێویستە بیزانیت: لە هەڵمەتی هەڵبژاردنەکانی سەرۆکایەتیی ئەمریکادا، مەسک پشتیوانیی لە ترەمپ دەکات. ئەو لە ئێکس نووسیویەتی کە ئامادەیە بێ هیچ مووچە و ناونیشانێکی فەرمی ئەرکەکە لە ئەستۆ بگرێت.