یەحیا ڕەسوول: ئامادەکاریی تەواومان کردووە بۆ هەر هێرشێکی لەناکاو

ئاڤا نیوز

 

گوتەبێژی فەرماندەی گشتیی هێزەکانی عێراق دووپاتی دەکاتەوە هەموو ڕێکارەکانی تایبەت بە پاراستنی سنووریان گرتووەتەبەر و ئامادەیی هێزە ئەمنییەکانیشی لەو پێناوەدا ڕاگەیاند.

 

وێنە گەورەکە: جەنگی ئیسرائیل و حیزبوڵڵای لوبنانی بەردەوامە و مەترسیی هەیە جەنگەکە بەرفراوان بێت و وڵاتانی دیکەی ناوچەکە بگرێتەوە، بە تایبەتی گرووپە چەکدارەکانی عێراق کە هەڕەشەی تۆڵەسەندنەوەی کوژرانی حەسەن نەسروڵڵا دەکەن و چەند جارێک ئیسرائیلیان بۆردوومانکردووە.

 

ڕاگەیێنراوی فەرمی: یەحیا ڕەسوول، گوتەبێژی فەرماندەی گشتیی هێزەکانی عێراق ڕایگەیاند: ئەوپەڕی ئامادەکاریمان  کردووە، بۆ پاراستنی سەروەریی عێراق لە ئەگەری هەر هێرشێکی لەناکاو دا لەلایەن ئیسرائیلەوە، هاوکات هاوکارییەکانمان بۆ لوبنان بەردەوامە.

ئەوەی پێویستە بیزانیت: ڕۆژی دووشەممە 30-09-2024، عێراق لە دەروازەی قائیم پێشوازیی لە کاروانێکی پەنابەرەکانی لوبنان کرد کە ژمارەکەیان 144 هاووڵاتی بوو.

 

ئەمەش بزانە: ڕۆژی دووشەممە، عەبدولئەمیر یاڕەڵڵا، سوپاسالاری عێراق کۆبوونەوەیەکی ئەمنی بەبەشداری فەرماندەکانی هێزی ئاسمانی، وشکانی و پلاندانان و چەند بەرپرسێکی دیکە ئەنجامدا و دۆخی ئەمنیی وڵات تاوتوێکران.