عێراق ئەو کەسانە دەستگیر دەکات کە ئاهەنگیان بۆ کوژرانی حەسەن نەسروڵڵا گێڕابوو

ئاڤا نیوز

 

هێزە ئەمنییەکانی عێراق لە کەربەلا هەڵمەتێکیان دەستپێکردووە بۆ دەستگیرکردنی ئەو کەسانەی لە کاتی کوژرانی ئەمینداری گشتی حیزبوڵڵا ئاهەنگیان گێڕاوە.

 

وێنە گەورەکە: ڕۆژی 28-9-2024، سوپای ئیسرائیل کوژرانی حەسەن نەسروڵڵای لە هێرشێکدا بۆ سەر باڵەخانەیەک لە بەیرووت ڕاگەیاند، دوای چەند کاتژمێرێکیش حیزبوڵڵا کوژرانی سەرکردەکەیانی پشتڕاست کردەوە.

 

زانیاریی بەدەستهاتوو: سەرچاوەیەکی ئاگادار لە پارێزگای کەربەلا پاڵپشت بە زانیاری وردی هەواڵگری ئەوەی بۆ میدیای عێراق ئاشکرا کردووە، "هێزە ئەمنییەکان لەو پارێزگایە 44 هاووڵاتی سووریان دەستگیرکردوون، لە نێویاندا شەش ئافرەت هەن. زۆرینەشیان ئەوانەن کە لە کافێ و چێشتخانەو هۆتێل و ئارایشگەکانی ژنان کاریان کردووە.

 

زانیاریی زیاتر: بە گوتەی ئەو سەرچاوەیە، ئەو کەسانە بەتۆمەتی ئەوە دەستگیرکراون، دوای بیستنی هەواڵی کوژرانی حەسەن نەسڕوڵڵا، ئەمینداری پێشووی حیزبوڵڵای لوبنان ئاهەنگیان گێڕاوە.

 

ئەوەی پێویستە بیزانیت: دوای ڕاگەیاندنی کوژرانی نەسڕوڵڵا لەلایەن ئیسرائیل و پشتڕاستکردنەوەی لەلایەن حیزبوڵڵای لوبنان، لە چەندین شوێن ماتەمینی ڕاگەیێنراو لە چەند شوێنێکیش خەڵک ڕاژانە سەر شەقام و ئاهەنگیان گێڕا.