سەرۆكوەزیران بارزانی: پرۆژەی گەورەی گەشتیاریمان بۆ سنووری سۆران هەیە

ئاڤا نیوز

 

سەرۆكوەزیران مەسرور بارزانی، باس لە پڕۆژەكانی حكومەت بۆ سنووری ئیدارەی سەربەخۆی سۆران دەكات و دەڵێ پڕۆژەی گەورەی گەشتیاریمان بۆ سنوورەكە هەیە.

 

لێدوانی فەرمی: سەرۆكوەزیران مەسرور بارزانی سەبارەت بە شاری سۆران ڕایگەیاند: سۆران شارێکی گرنگە و هەر شارێکیش تایبەتمەندی خۆی هەیە، ئێمە پێویستمان بەوەیە ئاستی پەروەردە و فێرکردن لە هەموو کوردستان بەرەو پێشەوە ببەین، بەڵام بۆ ئەوەی بتوانین بەباشترین شێوە خزمەتی کەرتی پەروەردە و تەندروستی و هەموو کەرتەکانی دیکە بکەین، دەبێت داهاتی زیاترمان هەبێت.

لەلایەكی دیكەوە: سەرۆكوەزیران مەسرور بارزانی، سۆران و دەوروبەری و ناوچەكانی باڵەکایەتی، سیدەکان و ڕواندز و دەڤەرەكەی بە گشتی بە ناوچەی گەشتیاریی سەرنجڕاكێش وەسف كرد و ڕایگەیاند: ئێمە پرۆژەی زۆر گەورەی گەشتیاریمان هەیە بۆ ئەو سنوورە کە وادەکات بەشی زۆری داهاتەکەی بۆ خودی سنوورەکە بگەڕێتەوە، وا دەکات ئێمە وردە وردە ئاستی شارەکانمان بەرز بکەینەوە. هەر شارە و تایبەتمەندی خۆی هەیە و دەبێت ئەو تایبەتمەندییە بۆ شارەکان بگەڕێنینەوە و گرنگییان پێ بدەین.

باكگراوند: ئیدارەی سەربەخۆی سۆران، لە هەر چوار قەزاکانی سۆران، رواندز، چۆمان، مێرگەسۆر پێکهاتووە و 13 ناحیە و 797 گوند لەو سنوورە هەن.