بەهۆی نالەباری کەشوهەوا چەند پارێزگایەکی عێراق پشووی فەرمییان ڕاگەیاند

ئاڤا نیوز

 

بەهۆی ئەو کەشوهەوا نالەباری چەندین ناوچەی عێراق و هەرێمی گرتووەتەوە، پارێزگای دیالە و سەڵاحەددین بڕیاریاندا لە سەرجەم ناوەندەکانی خوێندن ئەمڕۆ بکرێتە پشووی فەرمی.

 

وێنە گەورەکە: شەپۆلێکی بارانبارین هەرێمی کوردستان و چەند ناوچەیەکی عێراقی گرتووەتەوە و بەپێی پێشبینییەکان تاوەکو ناوەڕاستی ئەم هەفتەیە بەردەوام دەبێت، هاوکات بەهۆی بوونی مەترسی دروستبوونی لافاو، تیمەکانی بەرگریی شارستانی و سەرجەم لایەنە پەیوەندیدارەکان خراونەتە حاڵەتی ئامادە باشییەوە. 

 

ڕاگەیێنراوی فەرمی: نووسینگەی میدیایی پارێزگای دیالە ڕایگەیاند: بەهۆی نالەباری دۆخی کەشوهەوا عەدنان محەممەد شمەری، بڕیاریداوە ڕۆژی یەکشەممە 03-11-2024  لە سەرجەم ناوەندەکانی خوێندنی قوتابخانە و زانکۆکان بکرێتە پشوو.

 

زانیاریی زیاتر: پارێزگاری سەڵاحەددینیش بڕیاریداوە لەسەرجەم ناوەندەکانی خوێندن بکرێتە پشوو، تەنیا ئەو ناوەندانە نەبێت کە تاقیکردنەوەی ویزاریی تێدا ئەنجام دەدرێت، هەروەها لە بەغداش لە قوتابخانەکان و بەڕێوەبەرایەتییەکان جگە لە بەڕێوەبەرایەتییە خزمەتگوزارییەکان کرایە پشوو. 

 

ئەوەی پێویستە بیزانیت: ئەم بڕیارە لە کاتێکدایە سەرۆکوەزیرانی عێراق، وەزارتی ناوخۆی ڕاسپاردووە دەستبەجێ یارمەتی بگەیێنرێتە ئەو کەسانەی بەهۆی لافاو و بارانبارین زیانیان بەرکەوتووە.