بەرەی مقاوەمە: ئامادەین بۆ ڕووبەڕووبونەوەی ئیسرائیل

ئاڤا نیوز

 

بزووتنەوەی 'ئەنساروالله'، کە یەکێکە لە هێزە چەکدارەکانی عێراق ئاشکرایکرد، ئامادەن بۆ ڕووبەڕووبونەوەی هەر جۆرە هێرشێکی ئیسرائیل.

 

وێنە گەورەکە: ئیسرائیل نامەیەک بۆ ئەنجوومەنی ئاسایشی نێودەوڵەتی دەنێرێت و بۆ یەکەمجار ناوی هێزە چەکدارەکانی عێراق دەهێنێت و تۆمەتباریان دەکات بەوەی هێرشی کوشندەیان دژی ئیسرائیل ئەنجامداوە و بوونەتە هۆی کوژرانی سەربازەکانی.

 

لێدوانی فەرمی: عەلی فەتلاوی، سەرکردەیەکی بزووتنەوەی 'ئەنساروالله ' ڕایگەیاند: "بەرەی مقاوەمەی عێراقی لەڕووی کەرەستە و ژمارەوە ئامادەن بۆ هەر هێرشێکی چاوەڕوانکراوی ئیسرائیل لەدژی هێز و سەرکردەکانیان، ڕێوشوێنی پێویستیش بۆ ئەو مەبەستە گیراوەتەبەر". 

 

لەلایەکی دیکەوە: لەبارەی بەردەوامی هێرشەکانیان بۆ سەر ئیسرائیل و هەڕەشەکانی تەلئەڤیڤ لە گرووپە چەکدارەکانی عێراق عەلی فەتلاوی ئاماژەی بەوەشکرد، هێرشی گرووپە چەکدارەکانی عێراق بۆ سەر پێگەکانی سوپای ئیسرائیل بەردەوامە و ڕۆژ بە ڕۆژیش چڕتر دەبێتەوە وهەڕەشەکانی تێلئەڤیڤ، ئۆپەراسیۆنەکانیان دژی ئیسرائیل ڕاناگرێت.