قەدەغەی هاوردەکردنی چەند بەرهەمێک ڕاگەیێنرا

ئاڤا نیوز

 

دوای پێگەیشتنی بەرهەمی ناوخۆیی بۆ وەرزی پاییز و سەرەتای زستان، بەڕێوەبەرایەتی کشتوکاڵی هەولێر هاوردەکردنی چەند بەرهەمێکی سەوزە و میوە قەدەغە دەکات.

 

وێنە گەورەکە: ساڵانە لە وەرزی پێگەیشتنی بەرهەمی ناوخۆیی، وەزارەتی کشتوکاڵ یان بەڕێوەبەرایەتی کشتوکاڵی پارێزگاکان بەپێی تایبەتمەندی کشتوکاڵی ناوچەکەیان قەدەغەی هاوردە دەخەنە سەر چەند بەرهەمێک.

 

لێدوانی فەرمی: هێمن سەید موراد، بەڕێوەبەری کشتوکاڵی هەولێر بە ئاڤا نیوزی وت، لە پارێزگای هەولێر بەرهەمی پاییزە پێگەیشتووە و لە سەرەتای پێگەیشتنی بەرهەمی زستانەین، بۆیە قەدەغە کراوە هەریەکە لە بەرهەمەکانی وەک پەتاتە، چەوەندەر، قەڕنابیت، کەلەرم و شێلم هاوردە بکرێت. ئەمەش لە پێناو ساغکردنەوەی بەرهەمی ناوخۆیی.

 

بەڕێوەبەری کشتوکاڵی هەولێر دەشڵێت، ئێمە گرفتمان لەگەڵ دەروازە و بازگەکانی ناوخۆی شارەکانی ناوەڕاست و خوارووی عێراق هەیە، لە دەروازەکانی هەرێمی کوردستان ئەو بەرهەمانە ناهێنرێن، بەڵام ئەوان زۆرجار پابەند نابن و گرفت بۆ بازاڕی کوردستانیش دروست دەکەن.