ئەمریکا سزای نوی بە سەر ئێران و حوسییەکاندا دەسەپێنێت

ئاڤا نیوز

 

ئەمریکا سزای بەسەر زیاتر لە 10 دامەزراوە و کەشتییدا سەپاند کە لە گواستنەوەی نەوتی ئێران و دابینکردنی پارە بۆ حوسییەکانی یەمەن تێوەگلاون.

 

چیرۆکی سەرەکی: سزاکان لەلایەن وەزارەتی دەرەوەی ئەمریکاوە سەپێنراون، ئامانج لەم سزایانە وەک وەزارەتی دەرەوەی ئەمریکا ئاماژەی بۆ دەکات بۆ ئەوەیە ئێران نەتوانێت "چالاکییە پیسەکانی" حوسییەکان پارەدار بکات.

 

ڕاگەیێنراوی فەرمی: لەبارەی سزاکانەوە وەزارەتی دەرەوەی ئەمریکا پەیامێکی بڵاوکردووەتەوە و تیایدا هاتووە، "تاوەکو ئەو کاتەی ئێران بەردەوام بێت لە بەکارهێنانی سەرچاوە نەوتییەکانی بۆ پارەدارکردنی هێرشەکان بۆ سەر هاوپەیمان و هاوبەشەکانی ئەمریکا و پشتیوانیکردن لە تیرۆر لە سەرتاسەری جیهان و نانەوەی ناسەقامگیری، ئەمریکاش لە بەکارهێنانی هەموو میکانیزمە بەردەستەکان بۆ لێپێچینەوە لەو ڕژێمە بەردەوام دەبێت."

 

لەلایەکی دیکە: هاوکات وەزارەتی گەنجینەی ئەمریکا سزای بە سەر 12 کەس و دامەزراوە، لە ناویشیاندا سەرۆکی بانکی ناوەندیی یەمەن لە سەنعا سەپاند؛ ئەمەش لەبەر ڕۆڵیان لە سپیکردنەوەی پارە و بەقاچاخبردنی چەک و گوێزانەوەی نەوتی ئێران لە بەرژەوەندیی حوسییەکان.